समाचार

बाँदरमुढे घटना जनयुद्धको सबैभन्दा ठूलो गल्तीः प्रचण्ड

चितवन, ३० चैत । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले चितवनको बाँदरमुढे घटना जनयुद्धमा भएको सबैभन्दा ठूलो दुर्घटना र गल्ती भएको दोहो¥याएका छन्।

बाँदरमुढे सहयोग समितिले शुक्रबार माडीमा आयोजना गरेको छलफल कार्यक्रममा अध्यक्ष प्रचण्डले बाँदरमुढे पीडितको घाउमा मल्हमपट्टी लगाउने आफ्नो नैतिक र राजनीतिक जिम्मेवारी रहेको बताए।

अहिले बलियो सरकार भएको भन्दै उनले राज्यका तर्फबाट हिजो भएका समझदारीअनुसार काम गर्न सकिने बताए।

बाँदरमुढे पीडितसँग निर्वाचनका समयमा आफूले गरेको तीन बुँदे सम्झौता कार्ययोजना बनाएर काम अगाडि बढेको उनले जानकारी दिए। यसअघिको सरकारले बाँदरमुढे घटनामा मृत्यु भएकालाई गरेको सहिद घोषणाप्रति कुनै विवाद नरहेको उनले प्रस्ट पारे।

घटनाका पीडितलाई परिचयपत्र वितरण गरेर सरकारका तर्फबाट राहतका काम अगाडि बढ्ने उनले जानकारी दिए।

सो अवसरमा बाँदरमुढे पीडित संघर्ष समितिका अध्यक्ष मुक्ति न्यौपाने, मैना लामिछाने र विश्वनाथ पौडेलले घाइतेको औषधि उपचार निःशुल्क हुनुपर्ने, यसअघि भएका सम्झौता कार्यान्वयन हुनुपर्ने बाँदरमुढेका नाममा उठाइएको राहत रकम स्पष्ट गरिनु पर्नेलगायतका माग राखेका थिए।

विसं २०६२ जेठ २३ गते तत्कालीन विद्रोही नेकपा माओवादीले थापेको विद्युतीय धरापमा परेर सार्वजनिक बसमा सवार ३८ जनाको मृत्यु भएको थियो भने ७२ घाइते भएका थिए।

यसअघि आजै माडीमा जनप्रतिनिधिसँग अन्तरक्रिया गर्दै उनले निकुञ्ज ऐन, २०२९ संशोधनको पहल थाल्ने बताए।

सो क्षेत्रका निर्वाचित सांसदसमेत रहेका प्रचण्डले चितवन राष्ट्रिय निकुञ्ज जनतालाई बरदान नभएर अभिशाप भएको बताए। उनले निकुञ्ज जनता बरदान हुने गरी ऐन संशोधन गर्न जोड दिए। उनले भने, ‘ऐन परिवर्तन गर्न नसके जनताको आन्दोलनमा म सहभागी हुन्छु।’ माडीको समृद्धि गर्न सके देशको समृद्धि हुने भन्दै उनले गाउँगाउँबाट विकास निर्माणका काम थाल्नुपर्ने बताए।

कार्यक्रममा माडी नगरपालिकाका प्रमुख ठाकुर ढकाल, उपप्रमुख ताराकुमारी काजी महतो, नेकपा एमाले नगर इन्चार्ज नारदमणि पौडेल, जिल्ला समन्वय समितिका सदस्य चूडामणि महतोलगायतले त्यस क्षेत्रका समस्याका बारेमा प्रचण्डलाई अवगत गराएका थिए।

SHAREShare on Facebook0Tweet about this on Twitter0

1 comment

  1. http://www.apsense.com/status/13795037-39133458 says:

    Im thankful for the blog article.

    http://www.apsense.com/status/13795037-39133458

Leave a Reply

Your email address will not be published. Required fields are marked *

थप केही राष्ट्रिय समाचारबाट

थप केही अन्तराष्ट्रिय समाचारबाट