‘कथा काठमाण्डू’को शीर्ष गीतमा हरिवंशको स्वर

title
बुधबार, भदौ ६, २०७५

काठमाडौं । चलचित्र कथा काठमाण्डूको नयाँ गीत सार्वजनिक भएको छ । चलचित्रको प्रदर्शन मिति नजिकिँदै जाँदा निर्माण पक्षले चलचित्रको प्रचारप्रसार स्वरुप चलचित्रको नयाँ गीता सार्वजनिक गरेको हो । चलचित्र असोज १२ गतेबाट अल नेपाल रिलिज हुनेछ ।

‘कथा काठमाण्डू’को सार्वजनिक शीर्ष गीतमा बुलेट फ्लो र बरिष्ठ कलाकार हरिवंश आचार्यको स्वर रहेको छ । सुरज विक्रम थापाको शब्द, संगीत र कम्पोज रहेको गीतमा काठमाडौंको अस्तव्यस्त दैनिकीलाई चित्रण गरिएको छ ।

गीतले फिल्मको मूल कथालाई प्रस्ट्याएको निर्देशक संगीता श्रेष्ठले बताइन् । ‘रातको कुरा…’ बोलको गीतमा अभिनेत्री प्रियंका कार्की र अभिनेता प्रमोद अग्रहरीको इन्टिमेट सिनका कारण चर्को आलोचना भइरहेको ‘कथा काठमाण्डू’ को कथा निर्देशक संगीताले नै लेखेकी हुन् ।

विजय राइको निर्माणमा तयार भएको यो फिल्ममा लुजा सिंहको छायांकन छ । ‘कथा काठमाण्डू’ तीन भिन्नभिन्न कथालाई बुनेर निर्माण गरिएको हो । यो फिल्ममा प्रियंका र प्रमोदका अलावा आयुष्मान देशराज जोशी, संजोग कोइराला, सन्ध्या केसी, प्रेक्क्षा अधिकारीको प्रमुख भूमिका छ ।

अष्ट महर्जनको द्वन्द्व रहेको फिल्मका गीतमा मोहित मुनाल, कमल खत्री, प्रदीप बाँस्तोला र सुरज विक्रम थापाले संगीत भरेका छन् । उक्त फिल्ममा सम्पादनको जिम्मेवारी मित्र गुरुङले सम्हालेका छन् ।