कमल र मुन्नीले जिते स्वर्ण

title
मङ्लबार, अशोज २३, २०७५

काठमाडौं । बेलायतको ओरचेस्टरमा सम्पन्न विश्व उमा कुङफु च्याम्पियनसिपमा नेपाली खेलाडीले स्वर्ण पदक जितेका छन् । सोमबार भएको खेलमा कमल मगर र मुन्नी लामा तामाङले स्वर्ण जितेका पदक जितेका हुुन् ।

सातीन स्पर्धामा सहभागी कमलले पुरुष नाइन स्टिकमा स्वर्ण जितेको नेपाल उमा कुङफु संघका अध्यक्ष सिद्धार्थ लामा तामाङले जनाए । कमलले मोङकी बक्सिङमा थप एक रजत पनि हात पारे । किक बक्सिङमा भने कमल पदकविहीन रहे ।
त्यस्तै, मुन्नीले ताइची स्पर्धामा नेपाललाई स्वर्ण दिलाइन् । मुन्नीले गत अगष्ट–सेप्टेम्बरमा जर्मनीमा भएको १२ औं विश्व मार्सल आर्ट च्याम्पियनसिपमा पनि कांस्य जितेकी थिइन् ।

राष्ट्रिय खेलकुद परिषद्अन्तर्गत संघसंस्था समन्वय शाखाका प्रशासकीय अधिकृत ओमनाथ न्यौपाने अफिसियल र उमा कुङफु संघका केन्द्रीय सदस्य अशोक केसी व्यवस्थापकका रुपमा टोलीसंगै बेलायतमा रहेका छन् ।

प्रतियोगिता अक्टोबर ५ तारिखदेखि सुरु भएको थियो । प्रतियोगितामा विभिन्न २१ राष्ट्रका १ हजार ५ सय खेलाडीको सहभागिता रहेको अध्यक्ष तामाङले जानकारी गराए ।