कामदारको तालाबन्दीले तल्लो मोदीखोला जलविद्युत् ठप्प : आयोजना प्रमुखकै मिलेमतोको आशंका

title
शुक्रबार, जेष्ठ २४, २०७६

म्याग्दी । परीक्षण उत्पादनको अन्तिम तयारीमा रहेको  २० मेघावाट क्षमताको तल्लो मोदी जलजविद्युत् आयोनामा कार्यरत कामदार र कर्मचारीले तालाबन्दी गरेका छन् । निर्माणकार्यमा संलग्न कामदार र कर्मचारीले स्वतः स्थायी गर्नुपर्ने माग राखेर कुश्मा नगरपालिका-७ स्थित कार्यालयमा तालाबन्दी गरेका हुन्।

उनीहरुले विद्युतगृह, हेडबक्स र सुरुङमा भइरहेको निर्माणकार्यसमेत तीन दिनदेखि बन्द गरेका छन्। आयोजनाले असार पहिलो साता परीक्षण उत्पादन थाल्ने तयारी गरेको थियो । निजी क्षेत्रको मोदी इनर्जी लिमिटेडले निर्माण गरेको आयोजनामा कार्यरत कामदारले स्वतः स्थायी गर्नुपर्ने, प्रभावित क्षेत्रका बासिन्दालाई नै स्थायी रोजगारीको व्यवस्था हुनुपर्ने र विद्युतगृहलगायतका संरचना निर्माणमा पछिल्लो समय राखिएका कर्मचारी र कामदारलाई स्थायी गर्न नपाउने  माग राखेका छन्।

आयोजनामा कार्यरत ४० कर्मचारीले यही जेठ २० देखि काम बन्द गराएपछि निर्माणकार्य प्रभावित भएको छ । ‘हामी शुरुदेखि निर्माणकार्यमा कार्यरत कर्मचारीलाई थाहै नदिइ बाहिरबाट कर्मचारी राख्ने काम भएको छ,’ कर्मचारी सौरभ पौडेलले भने, ‘हामीलाई स्थायी गर्ने भन्दै पटक-पटक झुटो आश्वासन दिएका कारण बाध्य भएर तालाबन्दी गर्नुपरेको हो।’

कर्मचारीले यसअघि पनि जेठको ८ देखि १२ गतेसम्म पनि तालाबन्दीगरी काम ठप्प पारेका थिए। तर, तालाबन्दीपछि २० गते समस्या समाधान गर्ने सहमति गरे पनि सहमित पालनामा बेवास्ता गरेपछि पुनः तालाबन्दी गरेको उनले बताए।

आयोजनाले भने कुनै पनि कर्मचारीलाई स्थायी नगरिएको र विद्युत् उत्पादन थालिएपछि प्रक्रिया पूरा गरेर मात्रै स्थायी गर्ने योजना रहेको जनाएको छ। आयोजना प्रमुख पवनकुमार यादवका अनुसार अहिले परीक्षण उत्पादनको तयारीमा रहेका बेला केही दक्ष कर्मचारीलाई सहयोगीका रुपमा राखेर काम गराइएको छ तर, स्थायी गरिएको छैन।

‘हामीले कसैलाई पनि स्थायी गरेका छैनौं,’ आयोजना प्रमुख यादवले भने, ‘विद्युत् उत्पादनपछि नयाँ विज्ञापन गरेर स्थायी गर्ने प्रक्रिया शुरु गर्नेर्छाैँ,’ प्रमुख यादवले भने। अहिले कार्यरत कर्मचारीलाई नै स्थायी प्रक्रियामा पनि प्राथमिकता दिने आयोजनाको उद्देश्य रहेको उनको भनाई छ।

निजी क्षेत्रको मोदी इनर्जी लिमिटेडले निर्माण गरिरहेको टनेल परीक्षणका क्रममा पानी चुहिएका कारण मर्मत भइरहेको छ। वैशाखको अन्तिम साता परीक्षणका लागि टनेलमा पानी पठाउँदा धेरै ठाउँबाट चुहिएपछि मर्मतको काम थालिएको हो। कुश्मा नगरपालिका–७,चुवाको परादीस्थित पावरहाउसदेखि मोदी गाउँपालिकाको पातीचौरसम्म खनिएको चार हजार २०० मिटर लामो टनेलको बीचबीचमा कमजोर भू–भाग भेटिएको थियो।

तालाबन्दीका कारण मर्मतको काम रोकिएको छ। हेडबक्समा ढोका मर्मत गर्ने र परीक्षण गर्ने काम चलेको थियो भने विद्युत्गृहमा जेनेरेटरलगायतका सामग्री जडान र परीक्षणकै क्रममा थिए। कर्मचारीको आन्दोलनका कारण परीक्षण उत्पादन झन् ढिलाइ भएको आयोजना प्रमुख यादवले बताए।

विसं २०६९ साउनमा निर्माण शुरु गरिएको आयोजनाको उत्पादन लक्ष्य २०७४ असारमा थियो। आयोजनाले प्राकृतिक, मानवीयलगायत कारण देखाउँदै यसअघि धेरैपटक उत्पादन मिति सारेको थियो। अघिल्लो असार मसान्तभित्र उत्पादन गर्ने भनिए पनि पूर्वाधारतर्फ काम नसकिएको र टनेलभित्र केही समस्या आएका कारण ढिलाइ भएको कारण देखाइएको थियो।

स्थानीयले भने आयोजनाले भनेको मितिमा उत्पादन सुरु गर्ने नसक्ने भएपछि कृत्रिम कर्मचारी आन्दोलन देखाएर फेरि पछि धकेल्ने प्रयास गरेको आरोप लगाएका छन्। रासस