टिप्परमा कडाईं

ध्रुव ढकाल । सुनसरी-गत पुस १ बाट एक नम्बर प्रदेश ट्राफिक कार्यालयले पिक आवरमा टिप्पर सञ्चालन गर्न रोक लगायो । दुर्घटना बढेको भन्दै टिप्पर सञ्चालनमा रोक लगाएको ट्राफिकले त्यसको कडाईका साथ पालना गराउन सकेन । व्यवसायीहरुले नियम लत्याउँदै टिप्पर सञ्चालन गर्दा विराटचौकमा अवोध बालिकाको ज्यान गयो । यस लगत्तै टिप्परको सञ्चालनमा कडाई गरिएको छ । तर दुर्घटनाका कारणमा भने ट्राफिक प्रहरी र व्यवसायीले एक अर्कालाई दोष दिने क्रम रोकिएको छैन ।

त्यसोत, डेढ महिना अघि एक नम्बर प्रदेश ट्राफिक प्रहरी कार्यालय इटहरीले पिक आवर अर्थात विहान ९ बजे देखि ११ बजे सम्म र बेलुका ३ बजे देखी ५ बजे सम्म टिप्पर सञ्चालनमा रोक लगाएको थियो । दुर्घटना न्यूनिकरण गर्न भन्दै तामझामका साथ अभियान ल्याएको ट्राफिक प्रहरीको सो अभियान चलिरह“दा टिप्परको मनपरी पनि कायमै थियो । तर ट्राफिक प्रहरी मुख दर्शक बाहेक केही हुन सकेन । टिप्परको मनपरी र ट्राफिकको फितलो नियमका कारण माघ १४ गते मोरङको विराटचौंकका अवोध बालिका लक्ष्मी ढकालले ज्यान गुमाइन ।

लगत्तै, आक्रोशित भएका स्थानीयको आवेशले अर्काे दुर्घटना निम्त्यायो । अर्थात स्थानीयले ७ वटा टिप्पर जलाई दिए । त्यो मानवीय र भौतिक क्षतिको दोष भने टिप्पर सञ्चालक र ट्राफिक प्रहरीले लिन चाहिरहेका छैनन । बरु उनिहरु एक अर्कालाई दोष लगाइरहेका छन । पिक आवरमा टिप्पर चलाउन रोक लगाएकै कारण दुर्घटना भएको टिप्पर व्यवसायीको भनाई छ । पूर्वमा ५ सय भन्दा बढी टिप्पर संघमा आबद्ध छन् । ति सवै एकै पटक सडकमा आउँदा थप दुर्घटना भएको व्यवसायीहरु बताउछन । दुर्घटना न्यूनिकरणका लागि बरु टाइम कार्ड उपयुक्त हुने उनिहरु बताउछन ।

तर ट्राफिक प्रहरी भने पूर्वका सडकमा टाइम कार्डको व्यवस्था बैज्ञानिक नहुने तर्क गर्छ । बरु सञ्चालन हुने समयसीमा निर्धारण गर्दा दुर्घटनामा कमी आएको ट्राफिक प्रहरीको दावी छ । तर जानकारहरु भने दुर्घटना न्युनिकरणका लागि पैदलयात्रीको सजगता, दुरुस्त अवस्थाका सडक पूर्वाधार, ट्राफिक प्रहरीको कडाई र सवारी चालकले ट्राफिक नियमको पालना जरुरी रहेको बताउछन । अन्यथा अरुका कारणबाट समेत हुने दुर्घटनाको न्यूनिकरण असम्भवप्रायः छ ।