डाक्टर केसीको अनसन निरन्तर, डाक्टरले १ घण्टा काम नगर्ने

title
शुक्रबार, साउन ४, २०७५

काठमाडौं – डाक्टर गोविन्द केसीको समर्थनमा डाक्टरले आज अस्पताल परिसरमा एक घण्टा विरोधका कार्यक्रम गर्ने भएका छन् । कार्यालय समयमा आज एक घण्टा अस्पतालमा परिसरमा विरोधका कार्यक्रम गर्ने र आकस्मिकबाहेकमा एक घण्टा सेवा नदिइने नेपाल चिकित्सक संघले जनाएको छ ।

यस्तै आवासीय डाक्टरले भने आज पनि आकस्मिक बाहेकमा सेवा नदिने भएका छन् । नेशनल रेसिडेन्ट डक्टर्स एसोसिएसनले डाक्टर केसीका मागको विषयमा सरकारले अझै पनि चासो नदिएकाले आन्दोलनलाई निरन्तरता दिने बताएको छ ।

डाक्टर केसी अनशनमा बसेको आज २१ औँ दिन भएको छ । उपचारका लागि हिजो जुम्लाबाट काठमाडौं ल्याइए पनि मागबारे सरकारले चासो नदिएकाले माग पूरा नभएसम्म आफूले अनशनलाई निरन्तरता दिने केसीले बताउनुभएको छ । उहाँलाई त्रिवि शिक्षण अस्पतालमा यसअघि १४ पटक अनसन बसेकै ठाउँमा राखिएको छ ।

केसी पक्ष र सरकार पक्षबीबीच वार्ता हुने नहुने अन्योल झनै बढेको छ । चिकित्सा शिक्षा विधेयक फिर्ता नहुने सरकारी अडानका कारण अब कसरी निकास निकाल्ने भन्ने अन्यौल बढेको हो ।