निर्माता तथा निर्देशकले रुचाउने तर निरुताले नगर्ने कारण यस्तो छ

title
सोमवार, पुस ३०, २०७५

गर्छु भनेका फिल्म नै धमाधम छाडिन्

काठमाडौं । एकताकाकी चर्चित अभिनेत्री निरुता सिंह लामो अन्तरालपछि पुनः नेपाली चलचित्रमा व्यस्त बन्न थालेकी छिन् । नाई नभन्नु ल–५ बाट नेपाली चलचित्रमा पुनरागमन गरेपछि उनी एक पछि अर्को गरी चलचित्रमा देखिने चर्चा चलिरहँदा उनले भने चलचित्र नगर्ने भन्दै पछि हट्न थालेकी छिन् ।

त्यसो त धेरै निर्माता निर्देशक उनलाई आफ्नो फिल्ममा भित्र्याउन चाहन्छन् । ८–९ वर्ष काँचको पर्दाबाट टाढा रहेपनि ‘नाइँ नभन्नू ल ५’ बाट निर्देशक विकासराज आचार्यले उनलाई कमब्याक गराए । भूमिका छोटो भए पनि उनको अभिनयले दर्शकलाई बाँध्यो । यो फिल्मपछि अहिले उनको हातमा फिल्मको लस्कर छ । गर्छु भनेका केही फिल्म छाड्दा समेत उनको व्यस्तता अझ बढ्दो पाइए पनि उनले ‘लभ स्टेशन’लगायत केही फिल्मबाट हात झिकेको विषयले चर्चा पाएको छ ।

हालै उनले महसञ्चारको निर्माणमा बनेको फिल्म ‘दाल भात तरकारी’ को छायांकन सकिन् । यसमा उनी बरिष्ठ हास्यकलाकार हरिवंश आचार्यको श्रीमतीको भूमिकामा छन् । यो फिल्मपछि उनको पाइपलाइनमा एक फिल्म थियो, ‘हजार जुनीसम्म’ । तर, उनले उक्त फिल्म पनि नगर्ने बताएकी छिन् ।

हाल सिक्किममा छायांकन भइरहेको फिल्ममा उनको ठाउँमा निर्माण टिमले अभिनेत्री सञ्चिता लुइँटेललाई अनुबन्ध गरेको छ । आफूलाई कमब्याक गराउने निर्देशकको फिल्म उनले छाड्नुको पछाडि पारिश्रमिकमा कुरा नमिलेको बुझिएको छ । त्यतिमात्र नभएर उनले भने आफ्नो भूमिकालाई लिएर पछि हटेको बताउन थालेकी छिन् ।

‘हजार जुनीसम्म’ मात्र होइन उनले सुदर्शन थापाको निर्देशन रहने फिल्म ‘सम्हालिन्छ कहिले मन’ पनि पारिश्रमिकमा कुरा नमिलेपछि नगर्ने निधो गरेको चर्चा छ । उनलाई अफर गरेको रोलमा सुदर्शनले अभिनेत्री गौरी मल्ललाई अनुबन्ध गरेका छन् । निरुताको ‘नाइँ नभन्नू ल ५’ पछि कुनै फिल्म रिलिज भएका छैनन् ।