पीपीएललाई आइसीसीले दियाे मान्यता, खेलको तयारी अन्तिम चरणमा

title
मङ्लबार, अशोज २३, २०७५

काठमाडौं । पर्यटकीय नगरी पोखरामा आउँदो कार्तिक ९ गतेदेखि २० गतेसम्म हुन लागेको पोखरा प्रिमियर लिग (पीपीएल) टी–ट्वान्टी क्रिकेट प्रतियोगिताले अन्तर्राष्ट्रिय क्रिकेट परिषद् (आइसीसी) को मान्यता पाएको छ । पीपीएल आयोजक क्वीन्स इभेन्ट म्यानेजमेन्ट प्रालिका प्रवन्ध निर्देशक छुम्बी लामाले पीपीएललाई आइसीसीबाट मान्यता प्राप्त भएको पत्र प्राप्त भएको जानकारी दिएका हुन् ।

मान्यता प्रदान भएको पत्रमा पीपीएल आइसीसीको नियम र कानुनमा आधारित रहेको र यो प्रतियोगिताले विदेशी खेलाडी पनि राख्न पाउने उल्लेख छ । नेपालमा क्रिकेट हेर्ने आधिकारिक निकाय नरहेको अवस्थामा आइसीसीले नै नेपालको सम्पूर्ण गतिविधि हेर्दै आएको छ । यसअघिका एभरेस्ट प्रिमियर लिग (इपिएल) र धनगढी प्रिमियर लिग (डिपिएल) ले पनि आइसीसीको मान्यता लिएको थियो ।

पीपीएल लिगमा विभिन्न ६ शहरका ६ टिमले प्रतिस्पर्धा गर्दैछ । पीपीएल टिमले यसअघि टिम मालिक, मार्की खेलाडी र खेलाडी अनुबन्ध गरिसकेको छ । वदेशी खेलाडी पनि अनुबन्ध गर्ने प्रक्रियामा क्लबहरु रहेका छन् ।

प्रतियोगिताका लागि तयारीका कार्य अन्तिम चरणमा पुगिसकेको आयोजकले जनाएको छ । प्रतियोगिताअघि गरिनुपर्ने अधिकांश कार्यक्रम त सम्पन्न नै भइसकेका छन् । यसअघि भएको अक्सनमा सबै टोलीले कम्तिमा १० नेपाली खेलाडी छनोट गरिसकेका छन् । स्थानीय खेलाडी र विदेशी खेलाडी केहि दिनमा तय हुने छन् । केहि टोलीले भने त्यसको टुङ्गो पनि लगाइसकेका छन् ।

आयोजकले रंगशालाको मैदान तयारी विगत तीन महिना अगाडि देखि सुरु गरेको थियो । स्थानीय सरोकारवालाहरुसँग पनि समन्वय गरेर कार्यक्रम अगाडि बढाइएको हो । दसैं लगत्तै शुरु हुने प्रतियोगिताले धेरै पोखरेली समर्थकहरुको मन जित्ने आँकलन छ । पर्वको माहोल भएकाले बाह्य तथा अन्तरिक पर्यटकका लागि पनि पीपीएल पोखरा घुम्न जाने एक अवसरका रुपमा हेरिएको छ ।

यसअघि पोखरामा स्थानीय स्तरमा माछापुच्छ«े प्रिमिअर लिग आयोजना भइसकेको छ । पीपीएलले पोखरेली क्रिकेटको विकासमा अर्को कोशेढुंगा बन्ने आयोजकको अपेक्षा छ ।