प्रचण्डको उद्घोषः कम्युनिस्ट सरकारले परिणाम नदेखाए सकिन्छौं

चितवन । नेपाल कम्युनिस्ट पार्टीका अध्यक्ष एवम् पूर्वप्रधानमन्त्री पुष्पकमल दाहाल प्रचण्डले कम्युनिस्ट पार्टीको दुई तिहाइ बहुमतको सरकारले काममा परिणाम नदेखाए सकिने खतरा रहेको बताउनुभएको छ ।

जिल्ला समन्वय समिति चितवनको दोस्रो जिल्ला सभाको उद्घाटन सत्रलाई सोमबार सम्बोधन गर्दै अध्यक्ष प्रचण्डले स्थानीय तहदेखि केन्द्रसम्म नै जनताको अपार सर्मथनसहितको सरकार रहेको बेलामा पनि काम गर्न नसकिए सकिने खतरा रहने टिप्पणी गर्नुभयो ।

उहाँले ‘विकास निर्माण र रचनात्मक काममा प्रतिपक्षले पनि सहयोग गर्छु भनेका बेला र  तलदेखि माथिसम्म नै आफ्नै सरकार रहेको अवस्थामा जनताले दिएको विश्वास अनुसार सबै सरकारहरुले जिम्मेवारीपूर्वक काम गर्नुपर्ने अध्यक्ष प्रचण्डको भनाइ छ ।

‘हामीले काम गर्न सकेनौं भने जनताले हामीलाई पत्याइरहन पर्दछ भन्ने आवश्यकता छैन, जनताले विकल्प खोज्छन्’ अध्यक्ष प्रचण्डले अगाडि थप्नुभयो, ‘यो त कम्युनिस्ट पार्टीका लागि निकै दुर्भाग्यको विषय हुन्छ ।’ हरेक स्थानीय तहले प्राथमिकता निर्धारण गरेर हरेक वर्ष गर्ने कामको योजना बनाउने र जनतालाई यथार्थ विषयका बारेमा जानकारी दिन सक्नुपर्ने उहाँको नाई छ ।

त्यस्तै कार्यक्रममा एक फरक प्रसङ्गमा कुरा गर्दै नेकपाका अध्यक्ष प्रचण्डले चीन, भारत र नेपाल मिलेर जोइन्ट भेन्चरमा ठूला परियोजनाहरु निर्माणका लागि अहिलेको समय अनुकुल भएको बताउनुभयो । ‘हामीले १२÷१५ हजार मेगावाटका ठूला विद्युत् परियोजनाहरु निर्माण गरी अन्र्तदेशिय सम्बन्धलाई मजबुत बनाउन सक्छौं, अब हाम्रो ध्यान यता जान जरुरी छ’ अध्यक्ष प्रचण्डले भन्नुभयो ‘अब काममा एक्सनमा जाने बेला भएको छ ।’

अध्यक्ष प्रचण्डले झण्डै १२ सय मेगावाटको जलाशययुक्त बुढिगण्डकी जलविधुत् परियोजना चिनियाँ कम्पनी गेजुवालाई दिने सरकारको निर्णयका बारेमा प्रचण्डले आफू प्रधानमन्त्री भएको बेलामा गरेको निर्णयमा नै अहिलेको सरकार आइपुगेको टिप्पणी गर्नुभयो । ‘एउटाले बनाउन दिने निर्णय गर्ने, अर्कोले भत्काउने, फेरि अर्कोले दिने यस्तैं काम भएको छ’ अध्यक्ष प्रचण्ड भन्नुभयो,‘मैंले जहाँ लगेर प्रकृया टुंग्याएको थिए, अहिले सरकार त्यही आइपुग्यो ।’