सुदूर र मध्यपश्चिम क्षेत्रमा गौरा पर्व मनाईंदै

title
सोमवार, भदौ १८, २०७५

काठमाडौं – सुदूर र मध्यपश्चिमका स्थानीयले आज उमामहेश्वरसहित दुबोको पूजा गरेर गौरा पर्व मनाउँदै छन् ।

भाद्र शुक्ल अष्टमीका दिन मनाइयो गौरा पर्वलाई यो क्षेत्रका मानिसले ऐतिहासिक मौलिक पर्वका रूपमा मान्ने गरेका छन् ।

सत्य युगमा हिमालय पुत्री पार्वतीले महादेव स्वामी पाऊँ भनी वर्षा ऋतुको भाद्र महिनामा जल, जंगल, जमिन र जनावरको डर नमानी तपस्या गरेपछि मनोकामना पूरा भएको सम्झनामा यो पर्व मनाउने गरिएको विश्वास गरिन्छ ।

गौरा पूजा गर्न कुश, काँस, सामा, तीतेपाती र अपामार्ग जस्ता वनस्पतिको प्रयोग गरिन्छ । कसैकसैले तिलको बिरुवा राखेर देवीको आकार बनाउने गर्दछन् ।

यसरी बनाइएको देवीलाई भाद्र शुक्ल अष्टमीका दिन गाउँको सफा घरमा भित्र्याएर ब्रतालुले निराहार बसी पूजा गर्ने परम्परा रहेको छ ।

यो पर्वमा केराउ, जौ, मस्याङ, मास र गुराँसको दाना भाद्र शुक्ल पञ्चमीका दिन भिजाएर राखिन्छ ।

यसलाई बिरुडा भनिन्छ, अष्टमीमा भगवतीलाई पूजा गरेर प्रसादका रूपमा बिरुडा चढाउने र भक्तजनलाई पनि प्रसादका रूपमा बाँडिन्छ ।

यस दिन सुदूरपश्चिमका स्थानीयले देउडा गीत गाएर नृत्य गरी रमाइलोसमेत गर्दछन् ।

पछिल्लो काठमाडौंमा बसाेबास गर्ने सुदूर तथा मध्यपश्चिमेली उपत्यकामा पनि गौरा पर्व मनाउन थालेका छन् ।