न्युजिल्याण्डकी पूर्व प्रधानमन्त्री जसिन्डा आर्डर्न यसै वर्ष हार्वर्ड विश्वविद्यालयमा एक विद्यार्थीको रूपमा प्रवेश गर्ने भएकी छन् ।
यो घोषणा अमेरिकाको म्यासाचुसेट्सको क्याम्ब्रिजमा रहेको प्रतिष्ठित आइभी लिग विश्वविद्यालयले गरेको हो ।
मङ्गलवार हार्वर्डले दिएको जानकारी अनुसार जसिन्डा हार्वर्ड केनेडी स्कुलमा ‘डुअल फेलोसिप’ अन्तर्गत सामेल हुनेछिन् । उनी एन्जेलोपोलोस ग्लोबल पब्लिक लिडर्स फेलो र हसर लिडरमा सामेल हुनेछिन् ।
‘हार्वर्ड विश्वविद्यालयमा फेलोको रूपमा सामेल हुन पाउँदा म असाध्यै आभारी छु । यसले मलाई मेरो अनुभव अरूसँग बाँड्ने अवसर मात्रै दिने छैन, यसले मलाई सिक्ने मौका पनि दिनेछ,’ आर्डर्नले विज्ञप्तिमा भनिन् ।
यस्तै, आर्डर्नले हार्वर्ड ल स्कुलको बर्कम्यान क्लेन सेन्टर फर इन्टरनेट एन्ड सोसाइटीमा अर्को एउटा छात्रवृत्ति पूरा गर्नेछिन् । जहाँ उनले अतिवादी सामग्रीलाई अनलाइन राख्ने तरिकाबारे अध्ययन गर्नेछिन् ।
बुधवार इन्स्टाग्राम पोस्टमा आर्डर्नले आफूले ‘केही बोल्ने, सिकाउने र सिक्ने’ बताएकी छिन् ।
जसिन्डा आर्डर्न पाँच वर्षभन्दा बढी समयका लागि न्युजिल्यान्डकी प्रधानमन्त्री भइन् । जनवरी २०२३ मा, उनले आफ्नो पदबाट राजीनामाको घोषणा गरेकी थिइन् । यो घोषणा गर्दा उनको गला अवरुद्ध भएको थियो । त्यति बेला उनले ६ वर्षसम्म यो ‘चुनौतीपूर्ण’ पद सम्हाल्न निकै मिहिनेत गरेको बताएकी थिइन् ।
त्यसपछि उनले अबको चार वर्ष उनीसँग योगदान दिनका लागि खासै केही पनि बाँकी नरहेको बताएकी थिइन् । त्यसैले आफूले अर्को चुनाव नलड्ने घोषणा गरेकी थिइन् ।
