उपचुनाव हुने दुवै जिल्ला समन्वय समिति सभापति नेपाली कांग्रेसले सुरक्षित गर्ने पक्का भएको छ । ओखलढुंगा र कैलालीमा जिसस सभापतिका लागि उपचुनाव हुँदैछ । दुवै जिल्लाको सभापति पदमा एमालेले समर्थन गरेको छ ।
जिसस सभापतिका लागि ओखलढुंगामा कांग्रेस एक्लैको बहुमत छ । ८ पालिका रहेको ओखलढुंगामा कांग्रेससँग ९ जना (स्वतन्त्र जितेको एक पनि कांग्रेसतिरै रहेको) पालिका पदाधिकारी छन् । एमालेसँग ५, माओवादी र जसपासँग १÷१ जना पदाधिकारी छन् । एमालेको पनि कांग्रेसलाई समर्थन हुँदा माओवादी र जसपाको दुई मत मात्र सत्ता गठबन्धन बाहिर छ ।
‘प्रक्रिया मात्र बाँकी हो, सभापति हाम्रो भइसक्यो’, कांग्रेस केन्द्रीय सदस्य रामहरि खतिवडाले भने । ओखलढुंगामा यसअघि पनि कांग्रेसकै सभापति थिए । २०७९ को चुनावबाट डिल्लीराम खनाल जिसस सभापति निर्वाचित भएका थिए ।
उनको निधन भएकाले उपचुनाव हुँदैछ । कांग्रेसले उपचुनावमा टेकराज भट्टराईलाई सभापतिका रुपमा अघि सारेको छ । ओखलढुंगा जस्तै कैलालीमा पनि एमालेले कांग्रेसलाई सहयोग गरेको छ । १३ पालिका रहेको कैलालीमा कांग्रेसका ८ र एमालेका ५ जना पालिका पदाधिकारी छन् । यो संख्या बहुमत हो ।
किनकि ४ जना पालिका पदाधिकारी रहेको माओवादीका एक जनाले मतदान गर्न पाउँदैनन् । मोहन्याल गाउँपालिका अध्यक्ष जितेका माओवादीका देवीदत्त उपाध्यक्ष निलम्बित छन् । भ्रष्टाचार मुद्दामा निलम्बित भएकाले यसअघि पनि उनले मतदान गर्न पाएका थिएनन् ।
उनले मतदान गर्न नपाउँदा कांग्रेस र एमाले बाहेक १२ जना पालिका पदाधिकारी मात्र (नाउपासँग ७, माओवादी ३ र एकीकृत समाजवादी १) बाँकी रहन्छन् । तर नागरिक उन्मुक्ति पार्टी (नाउपा) पनि सत्तारुढ गठबन्धन भएकाले अझ सहज छ ।
७ जना पालिका पदाधिकारी रहेको नाउपाले २०७९ को चुनावमा कांग्रेससँग प्रतिस्पर्धा गरेको थियो । एमालेको ५ पदाधिकारीको मत भएकाले नाउपाका इन्द्र चौधरीले जिससमा १२ मत पाएका थिए ।
तर कांग्रेसका पदमबहादुर कलेलले १३ मत ल्याएर जिसस जिते । कलेललाई स्वतन्त्र जितेका धनगढी उपमहानगर पािलिकाका मेयर गोपी हमालले मत दिएका थिए । यसपटक एमालेकै समर्थन हुँदा कांग्रेसकी टीका चौधरी जिसस सभापति निर्वाचित हुने पक्का छ ।
सम्बन्धित समाचार
लोकप्रिय समाचार
