स्ववियु निर्वाचनपछि अभियानमा फर्कने माओवादीको तयारी काठमाडौं–नेकपा माओवादी केन्द्र ‘तराई–मधेश जागरण अभियान’मा स्ववियु निर्वाचनपछि फर्कने भएको छ । फागुन २५ गते काठमाडौंमा राजावादीहरूले सडक आन्दोलन गर्ने सूचना पाएपछि अभियान रोकेर काठमाडौं फिर्ता भएका नेताहरू स्ववियु निर्वाचनपछि अभियानमा फर्कन लागेका हुन् ।

‘तराई–मधेस जागरण अभियान’का क्रममा रौतहटको कार्यक्रम सकेर उनीहरू काठमाडौं फिर्ता भएका थिए । पार्टी महासचिव देव गुरुङका अनुसार अब रोकिएको स्थानबाट कार्यक्रमले निरन्तरता पाउने छ । माओवादीले आफ्नो शक्ति विस्तार गर्न ०८४ लक्षित अभियान गरिरहेको छ ।

‘स्ववियु निर्वाचनपछि अभियानमा फर्कने भनेका छौँ । निर्णय भएको छैन ।’ महासचिव गुरुङले भने, ‘पुनः निर्धारित कार्यक्रम अनुसार कञ्चनपुरसम्म नै पुगेर मिसन पुरा गर्ने छौँ ।’

०७९ को निर्वाचनपछि ०८० भदौ १७ देखि चार महिने ‘जनतासँग माओवादी विशेष रूपान्तरण अभियान’ चलाइएको थियो । त्यसपछि विधान सम्मेलन गरेको थियो ।

तराई–मधेस जागरण अभियान सकेपछि पुनः २०८२ वैशाखमा मध्यपहाडी लोकमार्ग केन्द्रित पूर्व–पश्चिम जागरण अभियान सञ्चालन गर्ने माओवादीको कार्यक्रम छ ।