एजेन्सी । विश्वकप फुटबलको उपाधिका लागि क्रोएसिया र फ्रान्सबीचको आज प्रतिस्पर्धा हुँदैछ । आज राति पौने ९ बजे हुने फाइनल खेलमा उपाधि उचाल्ने लक्ष्यका साथ दुबै टिम प्रतिस्पर्धा गर्दैछन् । रसियाको राजधानी मस्कोस्थित लुज्हनिकी रंगशालामा नेपाली समयअनुसार ८ बजेर ४५ मिनेटमा फाइनल खेल सुरु हुनेछ । यो पटकको विश्वकपको उपाधि दौडमा क्रोएसिया नयाँ टिम हो भने फ्रान्स एक पटकको विश्वकप विजेता टिम हो ।
सेमिफाइनलमा इंग्ल्यान्डलाई २–१ गोलले पराजित गर्दै क्रोएसियाले विश्वकप फुटबलको फाइनलमा पहिलो पटक पाइला टेकेको हो । विश्वकप फुटबलको उपाधि क्रोएसियाले जितेमा आफ्नो फुटबल इतिहासमा ऐतिहासिक सफलता हात पार्नेछ ।
सन् १९९८ मा भएको विश्वकप फुटबलमा क्रोएसिया सेमिफाइनलसम्म पुगेको थियो भने सेमिफाइनलमा फ्रान्ससँग २–१ गोलले पराजित हुँदै उपाधि दौडबाट बाहिरिएको थियो । बलियो फ्रान्सलाई पन्छाउँदै विश्वकपको उपाधि चुमेमा क्रोएसियाको सबैभन्दा ठूलो उपलब्धि हुनेछ ।
यता, फ्रान्सले भने सेमिफाइनलमा बेल्जियमलाई १–० गोलले पराजित गर्दै १२ वर्षपछि फाइनलमा स्थान बनाएको थियो
। फ्रान्सको जितमा सामुएल उमटिटी नायक बनेका थिए । उनकै निर्णायक गोलमा फ्रान्स उपाधि नजिक पुगेको हो । फ्रान्सको विश्वकप फुटबलमा तेस्रो फाइनल प्रवेश हो । यसअघि सन् १९९८ मा भएको विश्वकप फुटबलको उपाधि फ्रान्सले पहिलो पटक उचालेको थियो । त्यस्तै, सन् २००६ मा फ्रान्स फाइनलमा पुग्दै उपविजेता बनेको थियो ।
क्रोएसियाले समूह चरणको खेलमा नाइजेरियालाई २–० गोलले, अर्जेन्टिनालाई ३–० गोलले पराजित गरेको थियो । त्यस्तै समूह चरणको आफ्नो अन्तिम खेलमा आइसल्यान्डलाई २–१ गोलअन्तरले पराजित गर्दै क्रोएसिया विश्वकप फुटबलको नकआउट चरणमा पुगेको थियो । प्रिक्वाटरफाइनलमा भने क्रोएसियाले डेनमार्कलाई पेनाल्टी सुटआउटमा ३–२ गोलले पराजित गर्दै क्वाटरफाइनलमा पुगेको थियो । क्वाटरफाइनलमा पनि आयोजक रसियालाई ४–३ गोलअन्तरले पराजित गर्दै विश्वकपको सेमिफाइनलमा प्रवेश गरेको थियो । सेमिफाइनलमा इंग्ल्यान्डमाथि २–१ गोलको जित निकाल्दै क्रोएसिया फाइनल पुगेको हो ।
यता, फ्रान्सले पनि विश्वकपको समूह चरणमा अष्ट्रेलियालाई २–१, पेरुलाई १–० र समूह चरणको अन्तिम खेलमा डेनमार्कसँग गोलरहति बराबरी खेलेको थियो । प्रिक्वाटरफाइनलमा भने अर्जेन्टिनालाई ४–३ गोलअन्तरले पराजित गर्दै विश्वकपको क्वाटरफाइनलमा पुगेको थियो । क्वाटरफाइनलमा उरुग्वेलाई २–० गोलअन्तरले पराजित गरेको फ्रान्सले सेमिफाइनलमा बेल्जियमलाई १–० गोलले पराजित गर्दै फाइनल प्रवेश गरेको हो । २० वर्षपछि फ्रान्स र क्रोएसिया विश्वकपको फाइनलमा प्रतिस्पर्धा गर्न लागेका हुन् । क्रोएसियालाई बदला लिने राम्रो अवसर रहेको छ भने फ्रान्स फेरि पनि क्रोएसियालाई पराजित गर्दै उपाधि चुम्ने लक्ष्यमा छ ।
