भैरेलाई टक्कर दिँदै पण्डित बाजेको लौरी

भैरेलाई टक्कर दिँदै पण्डित बाजेको लौरी
शुक्रबार, साउन ४, २०७५

काठमाडौं– असार महिनाभर रसिया विश्वकपको मारमा परेको नेपाली चलचित्र क्षेत्र त्यसपछि पनि निरन्तर ओरालोमा रहेको छ । प्रदर्शनमा आएका चलचित्रले आशातित व्यापार गर्न सकेका छैनन् । गत साता चार चलचित्र प्रदर्शनमा आएका थिए । केही चलचित्रले एक साताको व्यापार गरेपनि केही भने चाँडै नै हलबाट उत्रिए । गत साताजस्तै यो साता पनि चार चलचित्रको भिडन्त पक्का भएको छ ।

फ्राइडे रिलिज अन्तर्गत यो शुक्रबारबाट तीन वटा चलचित्र प्रदर्शनमा आएका छन् । दीपक ओली निर्देशित ‘पण्डित बाजेको लौरी’, दयाहाङ राई, बुद्धि तामाङ, वर्षा सिवाकोटी अभिनित सिनेमा ‘भैरे’ र सिर्जना सुब्बा, अर्पण थापा, ऋचा शर्मा अभिनित सिनेमा ‘चक्कर’ प्रदर्शनमा आएका हुन् ।

यी चलचित्रमध्ये कुन चलचित्रको बक्स अफिसमा सफलता बटुल्ने हो दुई दिनको व्यापारिक रिपोर्टबाट थाहा हुनेछ । गत साता प्रदर्शनमा आएका बिरंगना र बोबीले औसत व्यापार गरेको बुझिएको छ । यो साता प्रदर्शनमा आएका पण्डित बाजेको लौरी र भैरेको कडा टक्कर हुने देखिएको छ ।

‘पण्डित बाजेको लौरी’को बुधबार साँझ चावाहिलस्थित केएल टावरमा प्रिमियर आयोजना गरिएको थियो । बादी प्रथा र पण्डित्याइँ परम्परा दुवैलाई मिश्रण गरेर प्रस्तुत गरिएको सिनेमालाई प्रिमियिरमा उपस्थित सबैबाट प्रशंसा पाएको थियो । सिनेमामा बादी महिलाको भूमिकामा नायिका सन्ध्या केसी र उनका पतिको भूमिकामा कलाकार विजय बराल प्रस्तुत भएका छन् । यस्तै पण्डित बाजेको मुख्य भूमिकामा प्रविण खतिवडा प्रस्तुत भएका छन् ।

सिनेमामा मरिष्का पोखरेल, भोलाराज सापकोटा, प्रमोद अग्रहरी, कुलदीप अधिकारी, अनुपमा भण्डारी, लोकेन्द्र लेखक लगायतको अभिनय रहेको छ । फिल्मको कथा, निर्देशन र कलाकारको प्रस्तुति उत्कृष्ट रहेको प्रिमियरमा सहभागीको प्रतिक्रिया रह्यो । सिनेमाका कालाकारहरुले आफ्नो भूमिकालाई न्याय दिलाएको प्रतिक्रिया पाएको छ । प्रिमियरमा राम्रो प्रतिक्रिया पाएको चलचत्रिले प्रदर्शन प्रश्चात भने कस्तो प्रतिक्रिया पाउने हो त्यो जानकारी पाउन केही दिन कुर्नैपर्छ । तर, पनि चलचित्रले सफलता हात पार्नेमा निर्माण पक्ष ढुक्क देखिएको छ ।

त्यस्तै आजबाट नै प्रदर्शनमा आएको अर्को चलचित्र भैरेको पनि राम्रै प्रतिक्रिया मिलेको छ । चलचित्र युनिटले आइतबार प्रिमियर आयोजना गर्ने भने पनि यसअघि सार्वजनिक गीत, ट्रेलरका कारण दर्शकको साथ पाउने निर्माण पक्षको अपेक्षा हो । निर्माण टोलीले विहीबार राजधानीमा एक कार्यक्रमको आयोजना गरी चलचित्रका विषयमा जानकारी दिएको थियो । माथिल्लो मुस्ताङ तथा लोमान्थाङ क्षेत्रमा निकै नै कठिनतापूर्वक चलचित्रको छायांकन गरिएको निर्माण पक्षले जनायो । उक्त छायांकनका क्रममा कलाकारले व्यहोर्नुपरेका कष्टका विषयमा पनि नायक बुद्धि तामाङ तथा दयाहाङ राईले जानकारी दिएका थिए । निर्माण पक्षले ‘भैरे’को प्रचारप्रसारमा कुनै कसर बाँकी राखेको छैन ।

पत्रकार सम्मेलनमा चलचित्रका सम्पूर्ण कलाकार उपस्थित थिए । कार्यक्रममा नायक दयाहाङ राइले यो चलचित्रमा काम गर्दा निकै गाह्रो भएको र अहिले प्रतिफल आउन लाग्दा उत्साहित पनि भएको बताए । उनले भने–‘म सधै देशको कथा बोल्ने चलचित्र गर्न चाहन्छु । यसैले ‘भैरे’ मेरो टाइपको चलचित्र हो ।’ अर्का कलाकार बुद्दि तामाङले यो चलचित्रले नेपाली परिवेशको कथा बोल्ने भन्दै अर्गानिक बिषय उठाइएको बताए ।

चलचित्र ‘भैरे’मा काम गर्दा जाडोले निकै सताएको अनुभव नायिका बर्षा सिवाकोटीले राखिन् । उनले भनिन् ‘यो चलचित्रमा काम गर्दा निकै दुख पनि भयो । तर, यसको कथावस्तु मन परेकाले नै म काम गर्न तयार भएको हुँ ।’ चलचित्रले देशमै केही गर्न सकिन्छ भन्ने कथालाई उठान गरेको अर्की नायिका सुरक्षा पन्तको तर्क थियो । उनले पनि चलचित्रको कथावस्तु निकै पावरफूल रहेको बताइन् । अर्की नायिका जान्वी बोहराले चलचित्रमा काम गर्दा रमाइलो भएको भन्दै आफ्नो भूमिका दर्शकका लागि सरप्राइज हुने सुनाइन् । एभरेष्ट सूर्य बोहराको निर्देशनमा तयार भएको हो ।

त्यस्तै अर्को लेस्वियनको भूमिकामा लुटकी पुतली अर्थात सिर्जना सुब्बालाई प्रस्तुत गरिएको सिनेमा ‘चक्कर’ प्रदर्शनमा आएको छ । यो चलचित्रको प्रचारप्रसारलाई खासै नभए पनि चलचित्र कत्तिको चल्ने हो त्यो पनि यसै भन्न सकिने अवस्था छैन । चलचित्र धेरै बन्नु नेपाली चलचित्र क्षेत्रका लागि सुखद् पक्ष भए पनि एउटै मितिमा धेरै चलचित्र जुधाइनु निर्माता, निर्देशक मात्र नभएर कलाकारका लागि पनि दुखद् पक्ष हो । चलचित्रले राम्रो व्यापार नगरेको खण्डमा त्यसको प्रत्यक्ष असर कलाकारमा पर्नेमा द्विविधा छैन ।