पाशुपत क्षेत्रको विद्युतिय शबदाह गृहमा शबदाह गराउनेको संख्या बढ्दै, आवश्यक मेसिनको अभाब

सरस्वती बस्नेत 

काठमाडौंको पाशुपत क्षेत्रमा रहेको नेपाल कै पहिलो विद्युतीय शवदाह गृहमा मृतक आफन्तको शवदाह गराउनेको संख्या बढ्दै गएको छ ।

विद्युतीय प्रविधिबाट शबदाह गर्न व्यवहारीक, सामाजीक तथा आर्थिक हिसावले सहज हुने भएपछि विद्युतिय शवदाह गृहमा शवदाह गराउनेको संख्या बढेको हो । सर्वसाधारण पनि शवदाह गृहलाई बातावरण मैत्री साथै समय सापेक्ष र मानवीय संवेदनाको दृष्टिले समेत व्यवहारीक मान्न थालेका छन् ।

विद्युतिय शवदाह गृहमा १० वर्ष सम्मको बच्चाको शव दाह गर्दा २ हजार रुपँैया लाग्छ भने सो भन्दा बढी उमेरको शव दाह गर्दा ४ हजार रुपैंया शुल्क पशुपति क्षेत्र विकास कोषलाई बुझाउनुपर्छ । विद्युतीय प्रविधिबाट शबदाह गराउन चाहनेको संख्या बढेपनि माग र चाप अनुसार कोषले मेसिन थप्न सकेको छैन ।

हाल २ वटा मेशिन भएपनि कोषले १÷१ महिना आलोपालो गरी सञ्चालन गर्दै आएको छ । विद्युतीय प्रविधिबाट शवदाह गराउनेको चाप थपिएपछि कोषले नयाँ मेसिन जडानका लागि टेण्डर प्रक्रिया अघि बढाएको र ३ महिना भित्रै नयां मेशिन जडान हुने जनाएको छ ।

नेपालको एकमात्र विद्युतीय शवदाह गृह २०७२ माघ १० बाट सञ्चालनमा आएको हो । जहां हाल दैनिक करिब १९ वटा सम्म शवदाह हुने गरेको छ । सञ्चालन भएदेखी गत आर्थिक वर्षको अन्तसम्म ७ हजार ८ सय ३८ शबदाह गरिएको कोषले जनाएको छ ।

कोषले शबदाह गृह संगै २५ शव क्षमताको चिस्यान कक्ष पनि सञ्चालमा ल्याएको छ । आधुनिक शवदाह प्रणाली पर्यावरणीय स्वास्थ्यको हिसावले पनि उपयोगी भएकोले बढ्दो शहर क्षेत्रमा शवदाहको लागि मेसिनको आवश्यकता बढ्दो छ ।