भन्दा अनौठो, सुन्दा झन अचम्म, इमान्दारीताको यो उदाहरण(प्रमाण सहित)

भन्दा अनौठो, सुन्दा झन अचम्म, इमान्दारीताको यो उदाहरण(प्रमाण सहित)
सोमवार, भदौ २५, २०७५

श्रीकृष्ण सुवेदी,काठमाडौं

तपाईले कहिल्यै आफैंले आफैंलाई कारबाही गरी पाऊँ भन्दै नियमनकारी निकायमा उजुरी दिनुभएको छ ? अथवा तपाईको गल्ती कसैले औंल्याइदिंदा कारबाही भोग्न तयार हुनुभएको छ ? छैन भने अचम्म नमान्नुस् । यस्तै प्रमाण फेला परेको छ पोखराबाट ।

पोखरा महानगरपालिका वडा नम्बर ९ का कृष्णप्रसाद देवकोटाले आफैंलाई कारबाही गर्न महानगरपालिकामा निवेदन नै दिएका हुन् । सुन्दा अचम्म लाग्ला, सडकमा आफैंले अन्जानबस फोहोर फालेको र उक्त काम गैरकानूनी भन्दै देवकोटाले महानगरपालिकाको कार्यालयमा कारबाही गरिपाऊँ भन्दै निवेदन दिएका थिए ।

निवेदन परेपछि कारबाही प्रक्रिया अघि बढाउँदै पोखरमा महानगरपालिकाले देवकोटालाई १ हजार रुपैंया नगद जरिवानाको रसिद काट्यो । उनले पनि उक्त रकम तिरेर इमान्दारिताको प्रमाण पेश गरे ।

त्यसो त उनले चर्चा कमाउनका लागि भने यसो गरेका होइनन् । न उनलाई इमान्दारीताको प्रमाण नै देखाउनु थियो । यो त उनको केवल सांकेति विरोध मात्र हो । हामी कुन हदसम्म गिर्छौं ? नियमनकारी निकाय किन मुकदर्शक बन्छ ? भन्ने मात्र हो ।

चोक–चोकमा यहाँ फोहोर फालेमा कडा कारबाही लेखिएको हुन्छ, तर त्यहीँ फोहोरको डंगुर थुप्रिएको हुन्छ । यसतर्फ किन ध्यान जाँदैन ? यसो हुनुका पछाडि जिम्मेबार को ? यीनै प्रश्नको उत्तर दिँदै उनले आफैँ कारबाहीका लागि निवेदन दिएका हुन् ।

पोखरा आफैमा सुन्दर नगरी हो, स्वदेशी तथा विदेशीहरुको प्रमुख पर्यटकीय क्षेत्रमा भइरहेको फोहर व्यवस्थापनमा नियमनकारी निकायले मात्र गरेर केही हुनेवाला छैन । त्यसैले हामी आफै सचेत बनौं भन्ने सन्देश कृष्ण प्रसादले दिन खोजेका हुन् ।