बंगबन्धु आयोजकलाई एन्फाको अल्टिमेटम, नेपालले खेल्ने नखेल्ने अझै अन्योल

बंगबन्धु आयोजकलाई एन्फाको अल्टिमेटम, नेपालले खेल्ने नखेल्ने अझै अन्योल
सोमवार, अशोज १, २०७५

काठमाडौं– नेपालले यो पटकको बंगबन्धु गोल्डकप प्रतियोगिता खेल्ने सम्भावना न्यून बन्दै गएको छ । पुरस्कारबापतको रकम नपाए अखिल नेपाल फुटबल संघ एन्फाले साविक विजेता नेपाली टोलीलाई बंगबन्धु गोल्डकप फुटबलका लागि नपठाउने जनाएको छ ।

बंगलादेश फुटबल संघको आयोजनामा अर्को महिना हुने बंगबन्धु गोल्ड कपको आयोजना मिति र समूह विभाजन तय भइसकेको छ । तर प्रतियोगिता आउन दुई सातामात्रै बाँकी हुँदा पनि नेपालको सहभागिता हुने–नहुने टुंगो अझै लागिसकेको छैन । यही बीचमा एन्फाले बंगबन्धु गोल्डकपको उपाधि जितेको पुरस्कार रकम उपलब्ध गराउन आयोजकलाई १२ दिने अल्टिमेटम दिएको छ ।

२२ जनवरी २०१६ मा बहराइनलाई ३–० गोलअन्तरले पराजित गर्दै नेपालले बंगबन्धु कप जितेको थियो । तर, उपाधि जितेको २ वर्षभन्दा बढी भइसक्दा पनि पुरस्कार रकम पाएको छैन ।

५० हजार अमेरिकी डलरमध्ये २५ हजार मात्र पाएको छ । बाँकी रकम सेप्टेम्बर २८ तारिखभित्र उपलब्ध नगराए आगामी प्रतियोगिता नेपालले खेल्ने छैन । एन्फाका महासचिव इन्द्रमान तुलाधरले भने, ‘उहाँहरुले पैसा तयारी छ त भन्नु भएको छ । हामीले त्यो पैसा पठाइ दिन अनुरोध गरेका छौं । पैसा प्राप्त नभए नेपालको सहभागिता हुनेछैन ।’

साविक विजेता समेत नेपाल समूह ‘ए’मा प्यालेस्टाइन र ताजकिस्तानसँग रहेको छ । अर्को समूहमा आयोजक बंगलादेश, फिलिपिन्स र लाओस रहेका छन् । बंगबन्धु गोल्डकप असोज १४ देखि २६ गतेका लागि तय भएको छ ।