क्षयरोगबाट संक्रमितको संख्या २१ लाख ५० हजार

क्षयरोगबाट संक्रमितको संख्या २१ लाख ५० हजार
सोमवार, चैत्र ११, २०७५

एजेन्सी। भारतमा सन् २०१८ मा क्षयरोगबाट संक्रमित नागरिकको संख्या २१ लाख ५० हजार पुगेको छ ।

भारतको स्वास्थ्य तथा परिवार स्वास्थ्यसम्बन्धी मन्त्रालयले दिएको पछिल्लो जानकारीअनुसार भारतमा सन् २०१८ मा मात्र क्षयरोगका २१ लाख ५० हजार नागरिकमा संक्रमण भएको छ । मन्त्रालयबाट प्रकाशित विज्ञप्तिमा यो जानकारी दिइएको हो । तर पहिलेको तुलनामा भारतमा क्षयरोगको उपचारमा सफलता प्राप्त भएको पनि विज्ञप्तिमा उल्लेख छ ।

सन २०१७ मा भारतमा क्षयरोगको उपचारको सफलताको दर २५ प्रतिशत मात्रै रहेकोमा सन् २०१८ मा ८३ प्रतिशत पुगेको छ । विज्ञप्तिअनुसार पहिलेका वर्षहरुमा भारतमा क्षयरोग संक्रमण हुने दर २९ प्रतिशत रहेकोमा सन् २०१८ मा आइपुग्दा भारी मात्रामा गिरावट आई चार प्रतिशतमा झरेको छ ।

विश्वमा रहेका क्षयरोगीहरुमध्ये एक चौथाई रोगी भारतमा मात्र रहेका छन् । भारत सरकारले सन् २०२५ सम्ममा क्षयरोग उन्मूलन गर्ने लक्ष लिएको छ । विश्व स्वास्थ्य संगठनको तथ्यांकअनुसार क्षयरोग विश्वमा सबैभन्दा धेरै नागरिकको ज्यान लिने १० रोगहरुमध्ये प्रमुखमा पर्दछ ।

विश्वभरमा सन् २०१७ मा मात्र करिब एक करोड नागरिकमा क्षयरोगको संक्रमण भएको देखिएको थियो ।