हरियाली व्यवस्थापनको शैली : घर सम्पन्न प्रमाणपत्र लिन दुईवटा बिरुवा रोपेकै हुनुपर्ने

हरियाली व्यवस्थापनको शैली : घर सम्पन्न प्रमाणपत्र लिन दुईवटा बिरुवा रोपेकै हुनुपर्ने
शुक्रबार, असार १३, २०७६

तनहुँ। तनहुँको व्यास नगरपालिकाले नयाँ घर निर्माण सम्पन्न लिन दुईवटा बिरुवा अनिवार्य रोप्नुपर्ने नियम लागू गरेको छ।  हरियाली नगर बनाउने उद्देश्यका साथ नगरपालिकाले घर निर्माण सम्पन्न प्रमाणपत्र लिनुअघि न्यूनतम दुई वटा बोटबिरुवा रोपण गर्नुपर्ने नीति लागू गरेको हो।

नगरपालिकालाई हरियाली नगर बनाउने उद्देश्यका साथ बृक्षरोपण अभियान सञ्चालन गर्न लागिएको उपप्रमुख मीरा जोशीले जानकारी दिइन्। ‘नगरभित्र निर्माण हुने घरधनीहरुले अनिवार्य रुपमा बिरुवा रोप्नुपर्नेछ,] उनले भने, ‘अन्यथा घर निर्माण सम्पन्नको प्रमाणपत्र जारी हुँदैन।’

नगरपालिकाका सबै वडामा रहेका सडकको वर्गीकरण गरी सडक किनारामा हरियाली प्रवर्द्धनका लागि वृक्षरोपण गर्ने कार्यलाई अभियानका रुपमा सञ्चालन गरिने जोशीले बताए । ‘यस कार्यमा नगरको सुन्दरताका लागि एकरुपता कायम गर्ने गरी नगरपालिकाबाट बोटबिरुवाहरु उपलब्ध गराइनेछ,’ जोशीले भने, ‘त्यस्ता बोटबिरुवाहरुको उत्पादन जग्गाधनीहरुले नै उपयोग गर्ने गरी संरक्षण गर्नुपर्नेछ।’

नगरपालिकाले फूलैफूलको नगर बनाउने नीति लिएको छ। नगरको सुन्दरताका लागि सडक किनारा र पार्क तथा खुल्ला स्थानको प्राकृतिक सुन्दरता एवं वातावरणीय स्वच्छता कायम गर्न बहुउद्देश्यीय नर्सरी स्थापना गर्ने नीति नगरपालिकाले पारित गरेको छ।

नगरपालिकाभित्र परम्परागत चौतारा र पोखरी संरक्षणलाई अभियानकै रुपमा अघि बढाइने उपप्रमुख जोशीले बताए। जोशीका अनुसार व्यास नगरपालिकालाई प्लास्टिक झोलामुक्त नगरपालिका बनाउन टोल विकास संस्थाहरुसँगको सहकार्य अघि बढाइने र वैकल्पिक झोला तयारी गर्नका लागि सहयोग प्रदान गरिनेछ। फोहरमैलाको एकीकृत व्यवस्थापनका लागि विशेष कार्यक्रम ल्याई प्राङ्गारिक खेती प्रणालीसँग आबद्ध गरी अभियानका रुपमा अगाडि बढाइने नगरपालिकाले जनाएको छ।

खरको छानोमुक्त नगर

नगरपालिकाले खरको छानोमुक्त नगर अभियान सञ्चालन गर्ने भएको छ। आगामी आर्थिक वर्ष ०७६/७७ मा खरको छानो भएका घरहरु जस्ताले छाउन नगरवासीलाई अनुदान दिइनेछ। नगरभित्र रहेका खरको छानो भएका घरहरुको अध्ययन गरी खर/स्याउलाको छानामुक्त नगरपालिका निर्माण गर्ने कार्यलाई तीव्रता दिइनेछ।

विदेशबाट फर्किएका युवालाई सीपमूलक तालीम

विदेशबाट फर्किएका युवालाई उद्यमी बनाउन नगरपालिकाले विभिन्न सीपमूलक तालीम प्रदान गर्ने भएको छ। स्वदेशमै बसेर उद्यम गर्न चाहने युवालाई लक्षित गरी नगरपालिकाले आगामी आर्थिक वर्ष सीपमूलक तालीम प्रदान गर्न लागेको हो।

बेरोजगार तथा वैदेशिक रोजगारबाट फर्किएका युवालाई लक्षित गरी उद्योग तथा कलकारखानासम्बन्धी तालीम दिइने व्यास नगरपालिकाका उपप्रमुख मीरा जोशीले बताए। उक्त कार्यक्रमका लागि नगरपालिकाले तीन लाख बजेट विनियोजन गरेको छ। ‘बेरोजगार तथा विदेशबाट फर्किएका युवालाई प्रदान गरिने तालीमले उनीहरुलाई स्वदशमै उद्यमी बनाउन सहयोग पुग्ने विश्वास लिएका छौँ,’ जोशीले भने।

नगर एम्बुलेन्स सञ्चालन

व्यास नगरपालिकाले आफ्नै एम्बुलेन्स सञ्चालन गर्ने भएको छ। नगरवासीको स्वास्थ्य सेवालाई व्यवस्थित गर्न नगरपालिकाले एम्बुलेन्स सञ्चालनमा ल्याउन लागेको हो। नगरपालिकाले प्रस्तुत गरेको आगामी आर्थिक वर्ष ०७६/७७ को नीति तथा कार्यक्रममा नगरवासीलाई सहज रुपमा स्वास्थ्य सेवा उपलब्ध गराउने उद्देश्यले एम्बुलेन्स सञ्चालन गर्न लागेको उल्लेख गरिएको छ।

नगरपालिकाभित्रका स्वास्थ्य संस्थाहरुलाई नगरवासीको स्वास्थ्य सेवामा समर्पित र सेवामुखी एवं विश्वसनीय बनाइने उपप्रमुख जोशीले बताए। उहाँका अनुसार एक वडा एक आधारभूत स्वास्थ्य केन्द्र र आवश्यक क्षेत्रमा नगर स्वास्थ्य संस्थाहरु सञ्चालनमा ल्याइनेछ। नगरपालिकाभित्रका स्वास्थ्य संस्थाहरुलाई कार्यक्षेत्रको नक्साङ्कन गरी घर-घरमा स्वास्थ्य परामर्श सेवा सञ्चालन गर्ने नीति नगरपालिकाले लिएको छ।

साथै सञ्चालित वडाका स्वास्थ्य संस्थाहरुलाई आफ्नो कार्यक्षेत्रभित्रका विद्यालयहरुमा महीनाको एक पटक बालबालिकाको स्वास्थ्य परीक्षण गर्ने गरी परामर्श सेवा सञ्चालन गरिनेछ।

वडा स्वास्थ्य केन्द्रहरुमा विभिन्न रोगहरुको परीक्षण गर्न घुम्ती प्याथोलोजी सेवाको व्यवस्था गरी नगरपालिकाभित्रका सबै वडामा बसोबास गर्ने प्रत्येक परिवारको स्वास्थ्य अवस्था झल्काउने अभिलेख तयार पारिने नगरपालिकाले जनाएको छ।