म्यान्चेस्टरको वर्षाले अमिल्यायो विश्वकप, भारत र न्यूजिल्यान्डबीचको खेल शुरु हुन सकेन

म्यान्चेस्टरको वर्षाले अमिल्यायो विश्वकप, भारत र न्यूजिल्यान्डबीचको खेल शुरु हुन सकेन
मङ्लबार, असार २४, २०७६

काठमाडौं–आईसीसी एकदिवसीय विश्वकप क्रिकेट अन्तर्गतको पहिलो सेमिफाइनलको न्यूजिल्यान्ड र भारतबीचको खेल वर्षाले प्रभावित भएको छ । टस जितेर ब्याटिङ गरिरहेको न्यूजिल्यान्ड ४६.१ ओभरमा खेलिरहँदा वर्षा शुरु भएपछि खेल प्रभावित भएको हो ।

म्यानचेस्टस्थित ओल्ड ट्राफोर्डमा भएको खेलमा टस जितेर पहिलो ब्याटिङ गरेको न्यूजिल्यान्डले वर्षा रोकिनु अघि ५ विकेट गुमाएर २ सय ११ रन बनाएको छ ।

न्यूजिल्याण्डका कप्तान केन विलियमसनले टस जितेर पहिलो ब्याटिङको निर्णय गरेपनि खेलमा ब्याटिङ शुरुवात भने राम्रो गर्न सकेन् । जसमा न्यूजिल्याण्डले पहिलो पावरप्लेमा ५० रन समेत कटाउन सकेन ।

यद्यपी तेस्रो विकेटका रुपमा मैदान प्रवेश गरेका कप्तान विलियमसन र रोस टेलरले उत्कृष्ट साझेदारी गरे । जसमा रोसले ६७ रन बनाउँदा कप्तान विलियमसनले पनि ६७ रन बनाए । यस्तै, न्यूजिल्यान्डका लागि हेनरी निकोलासले २८ रन, कोलिन डि ग्रान्डहोमले १६ रन बनाएका थिए ।

टस हारेर पहिलो फिल्डिङ गरेको भारतका बलरहरुले कसिलो बलिङ गरे । जसमा भुवनेश्वर मुमार, हार्दीक पाण्ड्या, जस्प्रीत बुमराह, रविन्दर जडेजा र युज्भेन्दर चहालले समान एक–एक विकेट लिएका हुन् ।

भारत र न्यूजिल्यान्डबीचको लिग चरणको खेल पनि वर्षाकै कारण अवरुद्ध भएको थियो ।