काँग्रेस केन्द्रीय कार्य समिति बैठक सुरु

काँग्रेस केन्द्रीय कार्य समिति बैठक सुरु
शुक्रबार, असार २७, २०७६

काठमाडौं । नेपाली काँग्रेस केन्द्रीय कार्य समितिको बैठक आजबाट सुरु भएको छ । नेपाली कांग्रेसको सानेपास्थित पार्टी केन्द्रीय कार्यालयमा जारी बैठकमा पार्टीको नियमावलीमा केन्द्रित भएर छलफल भईरहेको हो ।

बैठकमा विविध सहित १४ वटा एजेन्डा तय गरिएको छ । बैठकको सूरुमा भने नियमावली माथि छलफल केन्द्रित भएको छ ।

बैठकमा नेताहरुले भातृ संगठनहरुलाई नियन्त्रण हुने गरी नियमावलीमा प्रावधान राखिएकोमा आपत्ति जनाएका छन । भातृ संस्थाहरुलाई स्वतन्त्र ढंगले काम गर्न दिने गरी नियमावली संशोधन गर्न पार्टी नेतृत्वलाई सुझाव दिइएको पनि केन्द्रिय सदस्य पौडेलले बताउनु भयो ।

त्यसैगरी पार्टी अनुशासनको कुरा गर्दा आलोचना गर्न पाउने व्यवस्था राख्नपर्नेमा पनि नेताहरुको जोड छ । बैठकमा पार्टीको लेवी, पार्टीको सदस्यता नविकरण तथा वितरण, पार्टीको राष्ट्रिय जागरण अभियानको पहिलो चरणको कार्यक्रमको समिक्षा, केन्द्रिय अनुशासन समिति, नीति तथा प्रतिष्ठान समितिको कार्य प्रगति विवरणसहित देशका समसामयिक परिस्थितिका बारेमा पनि छलफल हुने नेपाली काँग्रेसले जनाएको छ ।

यसअघि बोलाइएको केन्द्रिय कार्य समितिको बैठकमा पार्टी सभापति शेरबहादुर देउवा तथा वरिष्ठ नेता रामचन्द्र पौडेल र नेता कृष्णप्रसाद सिटौलाबीच एजेन्डामा सहमति नभएका कारण स्थगित गरिएको थियो ।