मुलुकभर विभिन्न कार्यक्रमको आयोजना गरी आज संविधान दिवस मनाइँदै

मुलुकभर विभिन्न कार्यक्रमको आयोजना गरी आज संविधान दिवस मनाइँदै
शुक्रबार, अशोज ३, २०७६

काठमाडौं । नेपालमा भएका सम्पूर्ण क्रान्ति र आन्दोलनका उपलब्धिलाई संस्थागत गर्दै जनताबाट निर्वाचित प्रतिनिधिले संविधान सभामार्फत ‘नेपालको संविधान’ जारी भएको ऐतिहासिक दिन आज असोज ३ गते । सोही सम्झनामा आज संविधान दिवस विविध कार्यक्रमसहित भव्य रूपमा मनाइँदै छ ।

वि.सं. २०७२ असोज ३ गते संविधान सभाको बैठकमा तत्कालीन राष्ट्रपति डा. रामवरण यादवले नेपाली जनतासमक्ष संविधान घोषणा गर्नुभएको थियो । संविधान जारी भएको ४ वर्षको अवधिमा संविधानको कार्यान्वयन सन्तोषजनक रहेको पूर्वराष्ट्रपति डा. रामबरण यादवले बताउनुभएको छ ।

संविधान मिलेर बनाउने दलहरूले नै वर्तमानका समस्याको समाधान गर्नुपर्ने र हतियार उठाउनेलाई पनि वार्तामा बोलाएर समस्याको समाधान गर्नुपर्ने उहाँले बताउनुभयो । संविधानका मूल विशेषतामा आवधिक निर्वाचन, लोकतान्त्रिक मूल्य र मान्यता, कानुनको शासन, कानुनी राज्यको अवधारणा, स्वतन्त्र न्यायपालिका, पूर्ण प्रेस स्वतन्त्रता र समाजवाद लगायत छन् ।

दिवसका अवसरमा सरकारले आज विभिन्न कार्यक्रममो आयोजा गर्ने भएको छ । दिवसका अवसरमा राष्ट्रपति, उपराष्ट्रपति, प्रधानमन्त्री लगायत विभिन्न दलका नेताहरुले शुभकामना व्यक्त गरेका छन् ।

संविधान दिवसको अवसरमा आज सार्वजनिक बिदा दिइएको छ ।