काठमाडौं र ललितपुरमा रगत अभाव : चाड पर्वमा रक्तदान नहुँदा समस्या

काठमाडौं र ललितपुरमा रगत अभाव : चाड पर्वमा रक्तदान नहुँदा समस्या
बुधबार, कार्तिक ६, २०७६

काठमाडौँ र ललितपुर जिल्लामा रगतको अभाव देखिएको छ। नेपाल रेडक्रस सोसाइटीद्वारा सञ्चालित रक्त सञ्चार सेवा केन्द्रमा पर्याप्त रगत संकलन नहुँदा रगतको अभाव देखिएको हो ।

वर्षेनी चाडबाड र चाडबाडपछिको समयमा उपत्यकामा रगतको अभाव देखिने गरेको छ। यसलाई सम्बोधन गर्न खासै ध्यान दिएको देखिँदैन।

रक्त सञ्चार सेवा केन्द्रले रगतको अभाव भएकाले रक्तदान गर्न रक्तदातालाई आह्वानसमेत गरेको छ। कुन समूहको रगत कति अभाव भएको हो भन्नेबारे केन्द्रले जनाएको छैन।

सोसाइटीको सञ्चार विभागद्वारा आज बिहान जारी विज्ञप्तिमा काठमाडौँमा यो हप्तादेखि रगतको अभाव भएकाले रक्तदान गर्न आह्वान गरिएको र सबैको सहयोगले पर्याप्त स्टक भएका कारण दशैँको समयमा रगत अभाव नभए पनि दशैँपछि रक्तदान कार्यक्रम घटेकाले अभाव बढेको जनाइएको छ।

दशैँ भर्खरै सकिएको तथा तिहार र छठलगायतका पर्वको समय आइरहेको यस्तो समयमा कलेजसमेत बन्द भएको र रक्तदान कार्यक्रम पनि कम भएकाले अहिले रगतको मागबमोजिम आपूर्तिमा कठिनाइ परेको जनाइएको छ।

‘डेङ्गुलगायत विभिन्न रोगबाट प्रभावित बिरामीका लागि रगतको माग छ,’ रक्तसञ्चार सेवाका निर्देशक पवन गुप्ताले भने, ‘यस्तोमा बिरामीका आफन्तलाई अनुरोध गरेर रक्तदान गर्न भनिरहेका छौँ।’

रक्त सञ्चार केन्द्रका अधिकृत राम श्रेष्ठले अहिले सेवा केन्द्रको कालीमाटी कार्यालयमा दैनिक औषतमा ३०० युनिट रगतको माग भईरहेको तर आपूर्ति गर्न कठिनाइ भएको जानकारी दिए।

केन्द्रका निर्देशक मनिता राजकर्णिकारले सकेसम्म धेरै संघसंस्थासँग रक्तदानका लागि पहल गरिरहेको जानकारी दिइन।

पछिल्लो सयम केन्द्रको रक्त सेवा फितलो र प्रभावहीन बन्दै गएको गुनासो आइरहेको छ। भनेका सयममा चाहिएका रगत समूह सेवाग्राहीले पाउन धौधौ पर्ने गरेको छ।

ललितपुरको रक्तसञ्चार केन्द्रमा पनि रगतको अभाव भइरहेको शाखाका सभापति बाबुराजा महर्जनले जानकारी दिए। रेडक्रसमा राजनीतिक हस्ताक्षेप गर्दै सरकारले संचालक समिति नै विघटन गरिदिएपछि सेवा समेत प्रभावित हुँदै आएको छ।

नेपालमा रक्त संचार केन्द्रको संचालन रेडक्रस सोसाइटी मार्फत नै हुँदै आएको छ।