जेल जीवनमा रमाउने चोर, जेलको खानाकै लागि चोरी

जेल जीवनमा रमाउने चोर, जेलको खानाकै लागि चोरी
बिहिबार, कार्तिक २१, २०७६

मेगराज खड्का

रुकुम– रुकुम पश्चिमका एक ब्यक्तिले जेलमा बसेर खाने र बस्नेको जोहका लागि चोरी गर्ने गरेको पाइएको छ ।

चोरीको मुद्दामा ३ बर्ष कारागारको जेल सजाय भोगेका उनले जेलमा बसेर खाने बस्न सहज बनाउन पुनः पसल चोरी गरेको प्रहरीसँगको बयानमा बताएका छन् ।

जेल बस्न र खानकै लागि चोरी गर्ने व्यक्ति हुन रुकुम पश्चिम मुसिकोट नगरपालिका वडा नं.२ रातामाटाका २० बर्षीय राजु परियार ।

उनी अहिले रुकुम पश्चिम मुसीकोट नगरपालिका वडा नं. १ त्रिबेणी चोक स्थित एक मोवाईल पसल चोरीको आरोपमा पक्राउ परेका छन् ।

जिल्ला प्रहरी कार्यालय रुकुम पश्चिमका अनुसार उनी यसअघि पनि सदरमुकाम खलंगास्थित एक ब्यक्तिको घरबाट ल्यापटप र नगद चोरीको मुद्दामा ३ बर्ष कैद सजाय भुक्तान गरेर केहि समय अघि मात्र बाहिर आएका थिए ।

पछिल्लो पटकको चोरी घटनामा प्रहरीले अनुसन्धानको क्रममा सोधपुछ गर्दा थुना र कारागारमा हुँदा आफुलाई खान बस्न सहज हुने देखेर जानी जानी पुनः पसल चोरी गरेको बताएका छन ।

उनले मोवाईल पसल तोडफोड गरेर ५ हजार नगद र सरसमान चोरी गरेका छन् । चोरीको अभियोगमा उनलाई खलंगाबाट पक्राउ गरी चोरी तथा डाका सम्बन्धि कसुर मद्दामा अदालतबाट म्याद थपगरी अनुसन्धान जारी राखिएको जिल्ला प्रहरी प्रमुख सुमित खड्काले जानकारी दिए ।