सीमा विवादबारे भारतसँग वार्ता थाल्ने सरकारको तयारी

काठमाडौं । सीमा विवाद समाधानका लागि सरकारले भारतसँग वार्ता थाल्ने भएको छ ।

सत्तारुढ दल नेपाल कम्युनिष्ट पार्टी (नेकपा) का स्थायी समिति सदस्य सोमप्रसाद पाण्डेले सरकारले भारत सरकारसँग सीमा विवाद समाधानको लागि तत्काल वार्ता तथा छलफल अघि बढाउने तयारी गरेको स्पष्ट पारे ।

राजधानीमा आयोजित साक्षात्कार कार्यक्रममा नेता पाण्डेले सुगौली सन्धिमा नै भारतसँगको सीमाको बारेमा सबै कुरा टुँगो लगाईसकेको बताए ।

भारतीय सेनाले तत्काल उक्त नेपाली भुभाग छोड्न्पर्ने उनको भनाई छ । उनले वर्तमान सरकार ‘समृद्ध नेपाल र सुखी नेपाली’ नारालाई सार्थक तुल्याउने दिशामा लागिरहेको पनि जानकारी दिए ।

वर्तमान सरकार पूर्ण रुपमा सफल भएको दाबी गर्दै उनले दुई देशबीचको समस्या वार्ताबाट समाधान खोज्न तयार रहेको बताए ।

साक्षात्कारमा कांग्रेसका नेता डा. चन्द्र भण्डारीले देशका नेताहरुको सत्ता स्वार्थले गर्दा देश सुरक्षित हुन नसकेको टिप्पणी गरे। नेपालको सुरक्षा निकायपनि देशको सीमाप्रति संवेदनशील नभएको नेता भण्डारीको आरोप छ ।

त्यस्तै समाजवादी पार्टीका नेता डा. शिवजी यादवले भारत र चीन दुवै देशसँगको सीमा विवादलाई सरकारले कुटनीतिक पहलकदमीमार्फत हल गर्नुपर्ने आफूहरुको सुझाव रहेको बताए । संविधान संशोधन गर्नको लागि पनि आफ्नो पार्टी सरकारमा रहने निश्कर्ष पार्टीको हालै बसेको केन्द्रिय कार्यसमिति बैठकले निर्णय गरेको पनि नेता यादवले जानकारी दिए ।

राजपा नेपालका महामन्त्री केशब झाले चीनले नेपालको ११ ठाउँमा जमिन मिचेको आरोप लगाए । भारत र चीन दुवै देशसँग कुटनीतिक रुपमा सीमा विवाद हल गरिनुपर्ने झाको भनाई छ ।