कास्की क्षेत्र नम्बर २ मा चुनावी सरगर्मी : सत्तारुढ र प्रतिपक्षी दलका उम्मेद्वारबीच कडा प्रतिस्पर्धा

सुबास पौडेल
कास्की–प्रतिनिधिसभा सदस्य चयनका लागि कास्की क्षेत्र नम्बर–२ मा हुने उपनिर्वाचनका लागि चुनावी सरगर्मी बढेको छ ।

चुनावी प्रतिस्पर्धामा उत्रिएका उम्मेद्वारमध्ये सत्तारुढ नेपाल कम्युनिस्ट पार्टी नेकपाकी नेतृ विद्या भट्टराई अधिकारी र प्रमुख प्रतिपक्षी दल नेपाली कांग्रेसका नेता खेम पौडेल सबैभन्दा बढी चर्चामा छन् ।

कास्की क्षेत्र नम्बर २ का जनता तथा राजनीतिक विश्लेषकहरुले पनि यस पटकको निर्वाचनमा यी नै दुई नेतृत्वमध्ये एकले विजयी हासिल गर्ने विश्लेषण गरेका छन् ।

तर, चुनावी अभियामा रहेका दुवै उम्मेद्वारले भने आफ्नो जीत निश्चित रहेको दाबी गर्दै आफ्नो चुनावी एजेन्डा र भविष्यमा कास्कीको विकासका लागि चाल्ने कदमसहितका योजनाले जनताले आफूलाई विश्वास गर्ने बताउँदै आएका छन् ।

तत्काली संस्कृति, पर्यटन तथा नागरिक उड्डयनमन्त्री रहेका रवीन्द्र अधिकारी ताप्लेजुङमा भएको हेलिकोप्टर दुर्घटनामा परी ज्यान गुमाएपछि रिक्त रहेको यो स्थानमा उपनिर्वाचनमार्फत नयाँ नेतृत्व आउने छ ।

त्यसैले पनि यो निर्वाचनलाई महत्वका साथ हेरिएको छ । अघिल्लो चुनावमा रवीन्द्र अधिकारीले जितेको अधिकारीकै एजेन्डा र त्यसमा थपिएको केही एजेन्डा पूरा गर्न आफू चुनावी मैदानमा उत्रिएको स्वर्गीय अधिकारीकी पत्नीसमेत रहेकी विद्या भट्टराई अधिकारीले बताएकी छन् ।

सगरमाथा टेलिभिजनसँगको कुराकानीका क्रममा उनले भनिन्, ‘अहिले हामी घरदैलो, कोणसभा गर्दै, जनतासमक्ष आफ्नो एजेन्डासहित कुराकानी गरिरहेका छौं । जनताको माया र विश्वास पाएको छु । आशावादी छु । मैले जनताको मत पाउनेछु ।’

उनले स्वर्गीय अधिकारीले देखेको समृद्ध नेपाल सुखी नेपालीको अभियान नै अहिलेको आफ्नो एजेन्डा रहेको बताइन् । त्यस्तै पोखरालाई पर्यटकीय नगरी बनाउने अभियानमा आफू लाग्ने पनि उनले प्रतिबद्धता जनाइन् ।

पार्टीले आफूलाई दिएको जिम्मेवारी गहनताका साथ पूरा गर्ने भन्दै उनले भनिन्, ‘पार्टीले सर्वसम्मत रुपमा मलाई उम्मेद्वार बनाएको छ । मैले हिजो राजनीतिमा गरेको योगदान र स्वर्गीय रवीन्द्र अधिकारीले नेपाली राजनीतिमा पुर्‍याएको योगदानलाई पार्टीले कदर गरेको छ । पार्टीले महिला नेतृत्वलाई पनि अघि बढाउनुपर्छ भन्ने सोचले पनि मलाई उम्मेद्वार बनाएको हो । म पार्टी र जनताको विश्वासलाई टुट्न दिने छैन् ।’

अधिकारीले आफ्नो जीत निश्चित रहेको दाबी गरिरहँदा नेपाली कांग्रेसका उम्मेद्वार खेम पौडेलले पनि जनताको मत आफूले पाउने र चुनाव आफ्नै पक्षमा हुने बताएका छन् ।

सगरमाथासँगको कुराकानीका क्रममा उनले दुईतिहाई मतसहितको नेकपा नेतृत्वको सरकारप्रति जनता उदासिन भएकोले अब जीत कांग्रेसको हुने दाबी गरे ।

‘चुनावी अभियानका क्रममा हामीले जनताको सुभेच्छा पाएका छौं । अब नेतृत्वमा कांग्रेस आउनुपर्छ भन्ने सबैको माग छ । उहाँहरुकै मुद्दालाई हामीले हाम्रो मुद्दा बनाएका छौं । त्यसैले पनि जीत हाम्रै पक्षमा हुनेछ,’ उनले भने, ‘मेरो अबको प्रतिस्पर्धा व्यक्ति होइन सत्तासिन दल हो । सत्तामा पुगेको दलले जनताका एजेन्डा बिर्सिएकाले जनताले विकल्प खोज्नुहुन्छ भन्ने मेरो बुझाई ।’

उनले कास्कीलाई सम्मुन्नत बनाउन आफू र आफ्नो दल दृढ भएर लाग्ने पनि बताए ।