भारतको सहयोगमा निर्मित चन्द्रकोट क्याम्पसको भवन उद्घाटन

भारतको सहयोगमा निर्मित चन्द्रकोट क्याम्पसको भवन उद्घाटन
बुधबार, माघ २९, २०७६

गुल्मी । भारत सरकारको सहयोगमा निर्मित चन्द्रकोट क्याम्पस भवनको उद्घाटन गरिएको छ ।

गुल्मीको चन्द्रकोट गाउँपालिकामा निर्मित भवनको भारतीय राजदूतावासको विकास साझेदारी प्रभागका काउन्सिलर डा. प्रफुल्लचन्द्र शर्माले उपस्थितिमा भवनको उद्घाटन गरिएको हो ।

भवन उद्घाटन कार्यक्रममा चन्द्रकोट गाउँपालिकाका अध्यक्ष द्रोणबहादुर खत्री, जिल्ला समन्वय अधिकारी भक्तिराम मरासिनी लगायत स्थानीय राजनीतिक तथा सामुदायिक अग्रजहरुको सहभागिता थियो ।

निम्न आर्थिक अवस्थाका कारण पाल्पा, बुटवल, काठमाडौं आदि शहरहरुमा उच्च शिक्षा हासिल गर्न असमर्थ विद्यार्थीहरुलाई उच्च शिक्षा अध्यापन गराउने उद्देश्यका साथ स्थानीय जनताको पहलमा सन् २००८ मा चन्द्रकोट क्याम्पसको स्थापना भएको हो ।

त्रिभुवन विश्वविद्यालयबाट सम्बन्धन प्राप्त यस सामुदायिक क्याम्पसले स्नातक तहमा मानविकी, व्यवस्थापन तथा सामाजिक विज्ञान विषयको अध्यापन गराइरहेको छ ।

क्याम्पसमा ९० प्रतिशत भन्दा बढी छात्राहरु अध्ययनरत छन् । क्याम्पसको अभावमा उच्च शिक्षाबाट बञ्चित हुनुपरेको सो क्षेत्रका आर्थिक तथा सामाजिक रुपले विपन्न, पिछडिएका विद्यार्थीहरु विशेष गरी छात्राहरुका लागि यो विद्यालयको स्थापनाले उनीहरुको उच्च शिक्षा हासिल गर्ने इच्छालाई साकार बनाएको छ ।

नवनिर्मित ३ तले भवन निर्माण गर्न भारत सरकारको ४०.९९ मिलियन अनुदान सहयोगमा बनेको हो । यो भवनमा १२ वटा कक्षा कोठा, कार्यालय भवनका साथै प्रत्येक तलामा छात्र छात्राका लागि छुट्टै शौचालय छ ।

यस नवनिर्मित संरचनाले विद्यार्थीहरुको सिकाई वातावरणलाई अभिवृद्धि गर्ने अपेक्षा गरिएको छ ।