जबरजस्ती करणी मुद्दामा महरालाई सफाइ

जबरजस्ती करणी मुद्दामा महरालाई सफाइ
सोमवार, फाल्गुन ५, २०७६

काठमाडौं– जबरजस्ती करणी उद्योगको मुद्दामा पूर्व सभामुख कृष्ण बहादुर महराले सफाइ पाएका छन् । काठमाडौं जिल्ला अदालतले महारालाई आज सफाइ दिएको हो ।

न्यायाधीश अम्बरराज पौडेलको इजलासले महरालाई सफाइ दिएको हो । मुद्दाको बहस आइतबार नै सकिए पनि फैसला लेख्न समय नपुगेपछि मुद्दा हेर्दाहेर्दैमा राखिएको थियो ।

महराको पक्षबाट रमण श्रेष्ठ, भीमार्जुन आचार्य, शेरबहादुर केसी, लव मैनाली लगायतका ३७ जना अधिवक्ताले बहस गरेका थिए । संघीय संसद सचिवालयमा कार्यरत कर्मचारीमाथि बलात्कारको प्रयास गरेको आरोपमा महराविरुद्ध जिल्ला अदालत काठमाडौंमा मुद्दा दर्ता भएको थियो ।

असोज १२ गते संसद् सचिवालयकी कर्मचारीलाई बलात्कार गरेको आरोप लागेपछि महराले असोज १४ गते सभामुखबाट राजीनामा दिएका थिए। लगत्तै उनी असोज १९ गते महाअष्टमीका दिन सभामुखको सरकारी निवास बालुवाटारबाट पक्राउ परेका थिए ।

करिव १ महिना प्रहरी हिरासतमा रहेका महरालाई काठमाडौं जिल्ला अदालतले कात्तिक १९ गते पुर्पक्षका लागि जेल चलान गराउने आदेश दिएको थियो ।