सुन गायव पार्ने रसुवाको टिमुरेका प्रहरी निरीक्षक सहित १६ जना निलम्बन !

सुन गायव पार्ने रसुवाको टिमुरेका प्रहरी निरीक्षक सहित १६ जना निलम्बन !
बिहिबार, फाल्गुन १५, २०७६

काठमाडौं– अख्तियार दुरुपयोग अनुसन्धान आयोगले नियन्त्रणमा लिएको सुन बाँडिचुडी खाएको आरोपमा सीमा प्रहरी चौकी टिमुरेका प्रहरी निरीक्षक खेमप्रसाद नेपालसहित १६ प्रहरी कर्मचारीलाई निलम्बन गर्न सिफारिश गरेको छ ।

रसुवाको केरुङबाट भित्रिएको तस्करीको ४२२ ग्राम सुन समातेर आफैंले लुकाएको अभियोगमा प्रहरी निरीक्षक नेपाल सहित १६ जना प्रहरीलाई निलम्बन गर्न अख्तियारले प्रहरी प्रधान कार्यालयलाई सिफारिश गरेको प्रवक्ता प्रदीपकुमार कोइरालाले जानकारी दिए ।

तस्करीको सुन समातेर आफैंले लुकाएको अभियोगमा उनीहरुमाथि प्रहरी प्रधान कार्यालय र अख्तियार दुरुपयोग अनुसन्धान आयोगले छानविन गरेको थियो ।

छानविन गर्दा दोषी देखिएपछि उनीहरुलाई निलम्बन गर्न प्रहरी प्रधान कार्यालयलाई निर्देशन दिइएको अख्तियार दुरुपयोग अनुसन्धान आयोगले जनाएको छ ।

टिमुरे प्रहरीको इलाकाबाट आउँदै गरेको ना ६ख ४९३२ नम्बरको कन्टेनर चेकजाँच गर्दा आधा किलो सुन फेला परेको थियो । ११ पुसमा कन्टेनर चालक फुर्वा शेर्पाको साथमा फेला परेको सुन भन्सार कार्यालयमा बुझाउनुपर्नेमा इन्सपेक्टर नेपालसहितको टोलीले बाँडीचुँडी गरेको अनुसन्धानबाट खुलेको अख्तियारले जनाएको छ ।

निलम्बनमा पर्नेमा प्रहरी नायब निरीक्षक भोजबहादुर सेन वली, प्रहरी सहायक निरीक्षक रामशरण कुमाल, प्रहरी हवल्दारहरु रामशरण रिमाल, पुरुषोत्तम खत्री, रामकाजी लामा र गोपीबहादुर लो तामाङ रहेका छन् ।

यस्तै प्रहरी जवानहरु शिवनारायण चौधरी, युवराज खरेल, भविलाल रुम्बा लामा, रामचन्द्र विक, रिता चौधरी, मनोज आले, छेक्यु डोल्मा मोक्तान र ताराबहादुर प्रजा तथा प्रहरी कार्यालय सहयोगी हरिबहादुर श्रेष्ठ रहेका छन् ।

उनीहरु पदमा वहाल रहँदा आफ्नो विरुद्धको प्रमाण लोप वा नास गर्न सक्ने वा अनुसन्धानमा बाधा पुर्‍याउन सक्ने भएकाले निलम्बन गर्न सिफारिश गरेको आयोगले जनाएको छ ।