चीनबाट आवश्यक स्वास्थ्य सामग्री लिएर काठमाडौं आइपुग्यो विमान

चीनबाट आवश्यक स्वास्थ्य सामग्री लिएर काठमाडौं आइपुग्यो विमान
आइतवार, चैत्र १६, २०७६

काठमाडौं– कोरोना भाइरसबाट संक्रमितहरुको उपचारका लागि आवश्यक स्वास्थ्य सामग्री चीनबाट काठमाडौं ल्याइएको छ ।

नेपाल एयरलाइन्सको हवाईजहाज चीनबाट आवश्यक स्वास्थ्य सामग्री ल्याएकार आइतबार बिहान त्रिभुवन अन्तर्राष्ट्रिय विमानस्थलमा अवतरण गरेको हो ।

नेपाल एयरलाइन्सका अनुसार चीन गएको जहाज आइतबार बिहान साढे पाँच बजे अवतरण गरेको हो । कोरोना परीक्षण किट, स्वास्थ्यकर्मीहरुले सुरक्षाका लागि लगाउने विशेष प्रकारको पोशाक (पीपीई) लगायतका सामग्री लिएर वाइडबडी जहाज काठमाडौं आएको एयरलाइन्सले जनाएको छ ।

स्वास्थ्य सामग्री लिन नेपाल एयरलाइन्सको वाइड बडी विमान शनिबार ग्वाङ्झाओ गएको थियो ।

सरकारले ललितपुरमा रहेको ओबीसीआई प्राइभेट लिमिटेड कम्पनीमार्फत सवा एक अर्ब रुपैयाँ बराबरको स्वास्थ्य सामग्री खरिद नेपाल मगाएको हो।

सरकारले खरिद गरेका स्वास्थ्य सामग्रीमा गगल्स, पीपीई गाउन, जाँच गर्ने पञ्जा, सफाइमा प्रयोग हुने पञ्जा, एन–९५ मास्क, डिस्पोजेबल जुत्ता तथा अनुहार छोप्ने सामाग्री, इन्फ्रारेड थर्मोमिटर, कोरोना परीक्षण गर्ने पोर्टेबल पीसीआर मेसिन, पोर्टेबल पीसीआर रिएजेन्ट, संक्रमण परीक्षण किट, नमुना संकलन गर्ने ट्युबहरु रहेको जनाइएको छ ।