कोरोना भाइरसको संक्रमण रोक्न सेनाले ल्यायो मोबाइल एप

कोरोना भाइरसको संक्रमण रोक्न सेनाले ल्यायो मोबाइल एप
आइतवार, चैत्र १६, २०७६

काठमाडौं– विश्वव्यापी महामारीको रुप लिएको कोरोना भाइरस (कोभिड–१९) संक्रमणको जोखिम कम गर्ने कार्यलाई प्रभावकारी बनाउन नेपाली सेनाले मोबाइल एप निर्माण गरेको छ ।

सेनाले क्राउन सोर्सिङको अवधारणअनुरुप सर्वसाधारणबाट सूचना प्राप्त गरी आकस्मिक सेवा प्रवाह गर्ने उद्देश्यले ‘कोभिड–१९ रेस्पोन्स एप–नेपाल’ निर्माण गरेको हो ।

उक्त मोबाइल एपमार्फत सर्वसाधारणले आफ्नो परिवार, छिमेक तथा साथीभाइमा कोरोना भाइरससम्बन्धी कुनै पनि लक्षण देखिएमा विवरण पठाउन मिल्ने व्यवस्था गरिएको छ ।

साथै विपदको घडिमा जनमानसमा विभिन्न किसिमका अफवाहहरुको फैलावट रोक्न पनि एपले मद्दत गर्ने सेनाले विश्वास लिएको छ । मोबाइल एपमार्फत प्राप्त हुने सूचना तथा डाटाहरुलाई नेपाली सेनाले आवश्यक व्यवस्थापन, विश्लेषण तथा बिरामीको पहुँच स्थापना गर्न प्रयोगमा ल्याउने छ ।

हाललाई यो मोबाइल एप एन्ड्रोइड अपरेसिटङ सिस्टममा आधारित स्मार्ट फोनका लागि तयार गरिएको छ । केही दिनमै अन्य अपरेटिङ सिस्टममा आधारित स्मार्ट फोनका लागि पनि एप तयार गरिने सेनाको भनाइ छ ।

हालका लागि नेपाली सेनाको वेवसाइट बाट एप डाउनलोड गर्न सकिने छ ।