अमेरिकामा कोरोनाले मृत्यु हुनेको संख्या १० हजार नाघ्यो

अमेरिकामा कोरोनाले मृत्यु हुनेको संख्या १० हजार नाघ्यो
मङ्लबार, चैत्र २५, २०७६

अमेरिका- विश्वव्यापी महामारीको रुपमा फैलिएको कोरोना भाइरसको संक्रमण अमेरिकामा पनि तीव्र देखिएको छ ।अमेरिकामा पछिल्लो २४ घण्टामा १ हजार २४३ जनाले ज्यान गुमाएसँगै मृत्यु हुनेको संख्या १० हजार ८५९ पुगेको छ ।

अमेरिकामा एकैदिन २९ हजार ४३९ जनामा संक्रमण देखिएसँगै संक्रमित हुनेको संख्या ३ लाख ६६ हजार ११२ पुगेको छ ।

अमेरिकामा संक्रमितमध्ये १९ हजार ५७३ जना उपचारपछि निको भएका छन् । ८ हजार ८७८ जनाको अवस्था गम्भीर रहेको जनाइएको छ भने ३ लाख ३५ हजार ६८० जना उपचाररत छन् ।

यसैबीच, विश्वव्यापी रुपमा कोरोना भाइरसका कारण एकैदिन ५ हजार २०८ जनाले ज्यान गुमाएसँगै मृत्यु हुनेको संख्या ७४ हजार ६५४ पुगेको छ ।

संक्रमितको संख्या विश्वमा १३ लाख ४६ हजार ३६ पुगेको छ । एकै दिन ७३ हजार १३५ जनामा संक्रमण देखिएको छ ।
संक्रमितमध्ये २ लाख ७८ हजार बढी उपचारपछि निको भएका छन् ।

चीनको वुहानबाट शुरु भएको कोरोना संक्रमणको दर यूरोपियन मुलुक हुँदै पछिल्लो समय अमेरिकामा तीव्र देखिएको छ ।