विज्ञहरुको सुझाव लिएर लकडाउनको ढाँचा फेर्ने तयारीमा सरकार

विज्ञहरुको सुझाव लिएर लकडाउनको ढाँचा फेर्ने तयारीमा सरकार
मङ्लबार, जेष्ठ २०, २०७७

काठमाडौं- लकडाउन चैत ११ मा सुरु हुँदा मुलुकमा कोभिड–१९ संक्रमित २ जना थिए । लकडाउनको ७० औं दिन अर्थात सोमबार यो संख्या १ हजार ८११ पुगेको छ ।

यहीबीचमा ८ जनाको संक्रमणले मृत्यु भइसकेको छ । यसले लकडाउन मात्रै कोभिड–१९ संक्रमण रोकथामको उपाय होइन भन्ने प्रष्ट्याएको छ ।

यो कुरा विज्ञहरुले बताउँदै आएपनि सरकारले लकडाउनलाई निरन्तरता दिँदै आएको छ ।

उद्योगी व्यवसायी लगायतले लकडाउन खुकुलो बनाउँदै व्यवसाय सञ्चालनको वातावरण बनाउन माग गर्न थालेका छन् ।

सबैतिरबाट दवाव पर्न थालेपछि भने सरकारले लकडाउनको ढाँचा बदल्ने तयारी थालेको हो ।

संस्कृति पर्यटन तथा नागरिक उड्ययनमन्त्री योगेश भट्टराईले अब विशेषज्ञहरुको राय लिएर मोडालिटी बन्ने र त्यसकोआधारमा सरकार अघि बढ्ने बताए ।

पछिल्लो पटक सरकारले लकडाउनको अवधि लम्ब्याएर जेठ ३२ गतेसम्म पुर्‍याएको छ ।

लामो समय लकडाउन हुँदा जनजीवन समेत प्रभावित बन्न थालेको छ ।

प्रहरीले सवारी साधनको जाँचलाई कडाई गरेको छ । अत्यावस्यक सेवा र पास नलिइ सञ्चालनमा आएका सवारी साधनलाई नियन्त्रणमा लिई कारबाही गरिएको छ ।

यो अवधिमा अत्यावश्य खाद्य सामग्री र तरकारीका पसलहरु बिहान र बेलुका मात्र खुल्ने गरेका छन् । मानिसहरु सामाजिक दुरीलाई कायम गर्दै आफ्नो घर नजिकको पसल सम्म पुगेर किनमेल गर्ने गरेका छन् ।