अध्यक्षद्वयलाई दबाब दिन नेकपा केन्द्रीय सदस्यले थाले हस्ताक्षर अभियान

अध्यक्षद्वयलाई दबाब दिन नेकपा केन्द्रीय सदस्यले थाले हस्ताक्षर अभियान
आइतवार, असार २१, २०७७

काठमाडौं- नेपाल कम्युनिस्ट पार्टी नेकपाका केन्द्रीय सदस्यहरुले केन्द्रीय समिति बैठकको माग गर्दै आजदेखि हस्ताक्षर अभियान सुरु गर्ने भएका छन् ।

पार्टी फुटको संघारमा रहेकोले फुट्नबाट जोगाउन केन्द्रीय समिति बैठकको माग गर्दै हस्ताक्षर अभियान सञ्चालन गरिने केन्द्रीय सदस्य ठाकुर गैरेले बताए ।

पछिल्लो समय नेकपाभित्रको विवादले पार्टी फुटतर्फ उन्मुख बनेको बेला केन्द्रीय सदस्यहरुले शीर्ष तहबाट समस्या समाधान गर्न नसकेको भन्दै केन्द्रीय कमिटिबाटै समाधान खोज्नुपर्ने माग गरेका हुन् ।

केन्द्रीय सदस्य गैरेले भने ‘पार्टीभित्रको विवादको विषयमा केन्द्रीय सदस्यले पनि धारणा राख्न पाउनुपर्छ, दुई अध्यक्षले हाम्रा कुरा सुन्नुपर्छ, हामी पनि उहाँहरुका कुरा सुन्छौ।’

केही दिन यता केन्द्रीय कार्यालयमा पार्टी एकताको लागि धर्ना दिंदै आएका नेताहरु पार्टी नेतृत्वलाई एकताको दबाब दिन आजैदेखि हस्ताक्षर अभियानमा लाग्ने जनाएका छन् ।