आधा मात्र यात्रु बोक्नेगरी सार्वजनिक सवारीसाधन चलाउने सरकारी निर्णय

आधा मात्र यात्रु बोक्नेगरी सार्वजनिक सवारीसाधन चलाउने सरकारी निर्णय
बिहिबार, असार २५, २०७७

काठमाडौं- सरकारले सार्वजनिक सवारीसाधन चल्न दिने निर्णय गरेको छ। सरकारका प्रवक्ता सञ्चार तथा सूचना प्रविधि मन्त्री डा. युवराज खतिवडाले काठमाडौं उपत्यका भित्र सार्वजनिक सवारीसाधन चल्न दिने बताए ।

खतिवडाले असार २३ गते बसेको मन्त्रिपरिषद् बैठकले काठमाडौं उपत्यकाभित्र तीनवटा जिल्लालाई एउटा जिल्ला मानेर सवारीसाधन चल्न दिने निर्णय भएको बताएका छन् ।

काठमाडौं उपत्यका भित्र काठमाडौं, ललितपुर र भक्तपुरलाई एउटा जिल्ला मानेर सार्वजनिक सवारीसाधन चल्न दिने निर्णय भएको उनले बताए । त्यसैगरी उपत्यका बाहिर एउटा जिल्ला भित्र सवारी साधन चल्न दिइने निर्णय भएको छ।

सार्वजनिक सवारी साधनले बसको सिट क्षमता अनुसार ५० प्रतिशत मात्रै यात्रु बोक्न पाउनेछन्।

त्यसक्रममा बसको एक पंक्तिको एउटा सिटमा एकजना मात्रै यात्रु राख्नुपर्नेछ। यात्रु बोक्दा चालक र सहचालकले मास्क र पञ्जा अनिवार्य लगाउनुपर्नेछ ।

मन्त्री खतिवडाले धने कोभिडको कानुनी व्यवस्था भएसम्म यात्रुसमेत अनिवार्य मास्क लाउनुपर्नेछ भने बसमा अनिवार्य सेनिटाइजर राख्नुपर्नेछ। बस चलाइसकेपछि हरेक दिन निसंक्रमणको विधि अपनाउनुपर्नेछ।

सरकारले ट्याक्सी पनि खुलाउने निर्णय गरेको छ। ट्याक्सी सञ्‍चालन गर्दा पनि स्वास्थ्य सुरक्षाका सबै विधि अपनाउनुपर्ने पनि सरकारले निर्णय लिएको छ।