ओली-प्रचण्डको आजको वार्ता निर्णायक होला ?

ओली-प्रचण्डको आजको वार्ता निर्णायक होला ?
फाइल तस्वीर
मङ्लबार, साउन २०, २०७७

काठमाडौं- सत्तारुढ नेपाल कम्युनिस्ट पार्टी नेकपाका अध्यक्षद्वय केपी शर्मा ओली र पुष्पकमल दाहाल प्रचण्ड वार्तामा जुटेका छन् । प्रधानमन्त्री निवास बालुवाटारमा अहिले वार्ता जारी छ ।

बरिष्ठ नेता झलनाथ खनाल र संसदीय दलका उपनेता सुवास नेम्वाङलाई साक्षी राखेर वार्तामा जुटेका अध्यक्षद्वयले पार्टी भित्रको विवाद समाधान गर्ने तयारी गरेका छन् ।

प्रधानमन्त्री निवास बालुवाटारमा चार नेताबीचको छलफल शुरु भएको प्रधानमन्त्रीका प्रेस सल्लाहकार सूर्य थापाले जानकारी दिए ।

१३ साउनदेखि स्थायी कमिटी बैठक अनिश्चित बनेपछि दुई अध्यक्षबीच दिनहुँ छलफल चल्दै आएको छ। आइतबार झण्डै चार घण्टा छलफल चलेको थियो भने सोमबार दुई घण्टा छलफल भएको थियो।

लगातार छलफल भइरहेपनि दुवै पक्षले अडान छोडेका छैनन्। प्रचण्डको सर्तअनुसार, खनाल नेम्वाङ साक्षीका रुपमा बस्दै आएका छन्। प्रचण्डका तर्फबाट खनाल र ओलीका तर्फबाट नेम्वाङ साक्षी बसेका छन्।

प्रधानमन्त्री ओलीले अब महाधिवेशनमा जानुको विकल्प नभएको बताउँदै आएका छन्। तर, प्रचण्डले भने महाधिवेशनमै जाने निर्णय पनि स्थायी कमिटीबाट गर्नुपर्ने अडानमा छन्। केन्द्रीय कमिटीका सदस्यहरुले लिखित माग गरेकाले केन्द्रीय कमिटी बैठकबारे समेत स्थायी कमिटीमै छलफल हुनुपर्ने प्रचण्डको अडान छ।

ओलीले भने स्थायी कमिटी नभएर सचिवालयबाट सहमति जुटाउनुपर्ने पक्षमा छन्। ओलीले ३ साउनको सचिवालय बैठकलाई निरन्तरता दिनुपर्ने अडानमा छन्। त्यस दिनको सचिवालय बैठकमा ओलीले मंसीरमै महाधिवेशन गर्न पनि तयार हुनुपर्ने र त्यहीबाट अध्यक्ष छोड्ने बताउँदै आएका छन्।