बार्सिलोना च्याम्पियन्स लिगबाट बाहिरियो, बायर्न म्युनिखसँग ८-२ को लज्जास्पद हार

बार्सिलोना च्याम्पियन्स लिगबाट बाहिरियो, बायर्न म्युनिखसँग ८-२ को लज्जास्पद हार
शनिबार, साउन ३१, २०७७

एजेन्सी – च्याम्पियन्स लिग फुटबलमा बार्सिलोनाले बायर्न म्युनिखसँग लज्जास्पद हार बेहोरेको छ ।

शुक्रबार राति भएको खेलमा जर्मन क्लब बायर्न म्युनिखले स्पेनिस महारथी बार्सिलोनालाई ८–२ गोल अन्तरले हराउँदै सेमिफाइनलमा स्थान सुरक्षित गरेको हो ।

थोमस मुलर र फिलिप कौटिन्होले समान दुई/दुई गोल गर्दै बायर्नलाई शानदार जित दिलाए । अरू चार गोलमा जोशुआ किम्मिच, सर्ज जिनाब्री, रोबर्ट लेवान्डोस्की, र इभान पेरिसिचले गरे ।

मुलरले खेलको चौथो मिनेटमा बायर्नलाई सुरुवाती अग्रता दिलाएका थिए । त्यसको तीन मिनेटपछि डबिड अलाबाको आत्मघाति गोलसंगै बार्सिलोना खेलमा फर्कियो ।

२८औं मिनेटमा इभान पेरिसिकले बायर्नलाई २–१ को अग्रता दिलाए । सर्ज ग्रन्बीले २८औं मिनेटमा बायर्नका लागि तेस्रो गोल गरे । मुलरले ३१औं मिनेटमा ब्यक्तिगत दोस्रो गोल गर्दै पहिलो हाफको खेलमा बायर्नलाई ३-१ को अग्रता दिलाए ।

दोस्रो हाफमा बायर्नले बार्सिलोनालाई थप दबाबमा राख्यो । ५७औँ मिनेटमा बार्सिलोनाका फरवार्ड लुईस सुआरेजले गोल गर्दै खेल ४–२ को अन्तरमा झारे।

त्यसपछि बायर्नले लगातार चार गोल गर्दै बार्सिलोनालाई च्याम्पियन्स लिगमा नमिठो हार चखायो ।

जोसुआ किम्मिचले ६३औँ मिनेटमा गोल गर्दै बायर्नलाई ५–२ को अग्रता दिलाए । रोबर्ट लेवान्डोस्कीले ८२औँ मिनेटमा थप एक गोल गर्दै बायर्नको आधा दर्जन गोल पूरा गरे ।

बैकल्पिक खेलाडीको रुपमा मैदान छिरेका बार्सिलोनाका पूर्वखेलाडी फिलिप कौटिन्होले लगातार दुई गोल गर्दै बार्सिलोनालाई थप निराश पारे ।

८५औं मिनेटमा पहिलो गोल गरेका उनले खेल सकिन एक मिनेट बाँकी रहदाँ अर्को गोल थप्दै बायर्नलाई ८–२ को शानदार जित दिलाए ।