हिउँदे अधिवेशन बोलाउने सरकारी तयारी

हिउँदे अधिवेशन बोलाउने सरकारी तयारी
सोमवार, मंसिर ८, २०७७

काठमाडौं । सभामुख अग्निप्रसाद सापकोटाले संसद्को हिउँदे अधिवेशन बोलाउने तयारी भइरहेको बताएका छन् ।

आज सिंहदरबारमा सञ्चारकर्मीहरुसंग संक्षिप्त प्रतिक्रिया दिंदै संसद्को हिउँदे अधिवेशन बोलाउन सरकार र राजनीतिक दलहरुसंग छलफल भइरहेको जानकारी दिएका हुन् ।

एक अधिवेशन र अर्को अधिवेशनबीचको अन्तर ६ महिनाभन्दा बढी हुन नहुने संवैधानिक व्यवस्थाअनुसार आगामी पुस १७ भित्रै अधिवेशन शुरु गर्नुपर्ने व्यवस्था छ । त्यसअघि नै संसद बोलाउन अधिकतम प्रयास भइरहेको सभामुख सापकोटाले बताए ।

सभामुख सापकोटाले संसद नचलेका बेला सरकारले ल्याएको अध्यादेशहरुमा सदनमा छलफल हुने उल्लेख गरे ।

नियमित बैठक बस्नुपर्ने र अधिवेशन लामो समयसम्म चल्ने भएकाले कोरोना नफैलियोस् भनि स्वास्थ्य सुरक्षाका बिभिन्न उपायहरुका बारेमा पनि छलफल भइरहेको उनले बताए ।

संघीय संसद्को बर्षे अर्थात् बजेट अधिवेशन गत असार १८ गते अन्त्य भएको थियो । सरकारको सिफारिसमा राष्ट्रपतिबाट संसद् अधिवेशन आह्वान हुने व्यवस्था छ ।