भारतीय विदेश सचिवको श्रृंगलाको अर्थपुण नेपाल भ्रमण (भिडियो रिपोर्ट)

पुष्कर खतिवडा
काठमाडौं दुई दिने नेपाल भ्रमण आएका भारतीय विदेशसचिव हर्षवद्र्धन श्रृगंला शुक्रबार स्वदेश फर्किएका छन् । परराष्ट्र मन्त्रालयका सचिव भरतराज पौडेलको मैत्रीपूर्ण निमन्त्रणामा बिहिबार नेपाल आएका श्रृंगला उच्चस्तरीय भेटको दौडधुपमा रहे । उनले बिहीबारै राष्ट्रपति विद्यादेवी भण्डारी, प्रधानमन्त्री केपी शर्मा ओली, परराष्ट्रमन्त्री प्रदीप कुमार ज्ञवाली र परराष्ट्रसचिव भरतराज पौडेलसँग भेटवार्ता गरे ।

भिडियो रिपोर्ट हेर्नुहोस् :

बिहिबार काठमाडौं उत्रिएका श्रृंगला समकक्षी भरतराज पौडेलसँग दुईपक्षिय भेटघाट गरे । सो भेटमा द्विपक्षीय सम्बन्धको पुनरावलोकन भएको थियो । पौडेलपछि श्रृंगलाले परराष्ट्रमन्त्री प्रदीपकुमार ज्ञवालीसँग भेट गरे । भेटमा ज्ञवालीले नेपाल ऐतिहासिक दस्तावेज र प्रमाणका आधारमा सीमा विवाद समाधान गर्न चाहेको सन्देश दिए । जहाँ श्रृगंलाले वार्तामार्फत् राजनीतिक तहमा समाधान गर्ने जवाफ दिए ।

बिहिबारै श्रृंगलाले प्रधानमन्त्री केपी शर्मा ओलीसँग भेट गरे । श्रृंगलाले भारतीय प्रधानमन्त्री नरेन्द्र मोदीले पठाएको सन्देश सुनाए । समकक्षीको सम्बन्ध सुधार चाहेको सन्देशको जवाफमा ओलीले नेपाल, भारतसँगको सम्बन्ध उच्च तहमा पुर्याउन चाहेको बताए ।

श्रृंगलाको उच्चस्तरीय भेट यतिमात्रमा सीमित रहेन, बिहिबारै उनले राष्ट्रपति विद्यादेवी भण्डारीसँग समेत शिष्टचार भेट गरे । भेटमा श्रृंगलाले एक वर्षयता दुई देश बीच देखिएका समस्याबारे भारत जानकार रहेको र त्यसलाई वार्ताबाट नै समाधान गर्नुपर्ने बताए । उनले भारतका राष्ट्रपतिले पठाएको सन्देश राष्ट्रपतिलाई सुनाएका थिए ।

राष्ट्रपतीसँगको भेटपछि श्रृंगलाले प्रमुख विपक्षी दल नेपाली कांग्रेसका सभापति शेरबहादुर देउवासँग भेट गरे । भेटमा रामचन्द्र पौडेल र कृष्ण सिटौलासमेत आमन्त्रित थिए । भेटमा देउवाले दुई देश बीचमा उच्च राजनीतिक तहको संवाद आवश्यक भएको बताए ।

बिहिबार उच्चस्तरीय भेटकालागी दौडधुप गरेका श्रृंगला शुक्रबार भने बिभिन्न कार्यक्रममा सीमित बने । शुक्रबार उनले एसियन इनस्टिच्युट अफ डिप्लोमेसी एण्ड इन्टरनेशनल अफेयर्सको कार्यक्रममा भारतले कोरोना खोपका लागि काम गरिरहेको भन्दै खोप आए नेपालको समेत आवश्यकता पूरा गर्ने आश्वासन दिए ।

शुक्रबारै श्रृंगलाले गोरखामा भारतीय सहयोगमा निर्माण भएका आवासको हस्तान्तरण कार्यक्रममा सहभागीता जनाए । गोरखामा पुनर्निर्माण भएका तीन विद्यालय र भवनको उद्घाटन गर्न उनी गोरखा पुगेका थिए । त्यहाँ उनले आधुनिक नेपाल स्थापना गर्ने राजा पृथ्वीनारायण शाहको भूमिमा आउन पाउँदा आफू हर्षित भएको बताए ।

त्यसैगरी भारतीय सहयोगमा मनाङमा निर्माण भएको एक गुम्बाको काठमाडौंबाट नै उनले भर्चुअल उदघाट्न गरेका छन् । यसरी आफ्नो दुई दिने नेपाल भ्रमण सकेर श्रृंगला शुक्रबार अपरान्ह स्वदेश फर्किए । तर उनको भ्रमणले भने नेपालमा निकै चर्चा पाएको छ । श्रृंगलाको नेपाल भ्रमण र उच्चस्तरीय भेट निकै अर्थपुर्ण मानिएको छ ।