बजेट खर्च र राजस्व संकलनमा प्रभावकारी काम गर्न मुख्यमन्त्री भट्टको निर्देशन

बजेट खर्च र राजस्व संकलनमा प्रभावकारी काम गर्न मुख्यमन्त्री भट्टको निर्देशन
सोमवार, मंसिर १५, २०७७

काठमाडौं-सुदूरपश्चिम प्रदेशका मुख्यमन्त्री त्रिलोचन भट्टले बजेट खर्च र राजस्व संकलनमा प्रभावकारी काम गर्न विषयगत मन्त्रालयहरुलाई निर्देशन दिएका छन् ।
चालु आर्थिक वर्ष २०७७/०७८ को पहिलो चौमासिकमा बजेट कार्यान्वनको समीक्षा गर्न आयोजित कार्यक्रममा मुख्यमन्त्री भट्टले बजेट कार्यान्वयनमा प्रभावकारी काम गर्न निर्देशन दिएका हुन् ।

कार्यक्रममा प्रदेशका प्रमुख सचिव रामकृष्ण सुवेदीले राखेको खर्च र आम्दानीको प्रतिवेदन माथि छलफल भएको थियो ।

सुदूरपश्चिम प्रदेशमा चालु आर्थिक वर्षको पहिलो चौमासिकमा कुल बजेटको ६ दशमलव दुई नौ प्रतिशत अर्थात २ अर्ब ९ करोड ८६ लाख ३६ हजार रुपैयाँ खर्च भएको छ ।

त्यस्तै राजस्व संकलन तर्फ कुल लक्ष्यको ६४ दशमलव चार पाँच प्रतिशतले बढी राजस्व संकलन भएको छ ।

त्यस्तै विषयगत मन्त्रालयका सचिवहरुले पनि आ–आफ्नो मन्त्रालयको प्रगति विवरण सार्वजनिक गरेका थिए ।

सबै मन्त्रालयको कार्यप्रगति हेरेपछि मुख्यमन्त्री भट्टले जनअपेक्षा अनुसारका काम गर्न विषयगत मन्त्री र सचिवहरुलाई निर्देशन दिए ।

कार्यक्रममा पहिलो चौमासिकमा सुदूरपश्चिम प्रदेश सभा सचिवालयले सबैभन्दा बढी खर्च गरेको र आर्थिक मामिला तथा योजना मन्त्रालयले सबै भन्दा कम खर्च गरेको तथ्याङ्क प्रस्तुत गरिएको थियो ।

जसअनुसार प्रदेश सभा सचिवालयले १९ दशमलव पाँच एक प्रतिशत, मुख्यमन्त्री तथा मन्त्रीपरिषद्को कार्यालयले १ दशमलव दुई नौ प्रतिशत, आर्थिक मामिला तथा योजना मन्त्रालयले शुन्य दशमलव आठ एक प्रतिशत, उद्योग पर्यटन वन तथा वातावरण मन्त्रालयले ७ दशमलव चार पाँच प्रतिशत, भूमि व्यवस्था कृषि तथा सहकारी मन्त्रालयले ४ दशमलव दुई नौ प्रतिशत, भौतिक पूर्वाधार विकास मन्त्रालयले ८ दशमलव दुई पाँच प्रतिशत, सामाजिक विकास मन्त्रालयले ८ दशमलव शुन्य आठ र वित्तीय हस्तान्तरण स्थानीय तहले ८ दशमलव पाँच एक प्रतिशत खर्च गरेका छन् ।