कोरोना कहरले बन्द सिनेमा हल आजदेखि खुले

कोरोना कहरले बन्द सिनेमा हल आजदेखि खुले
शुक्रबार, पुस १०, २०७७

काठमाडौँ— नेपालमा कोरोना भाइरसको संक्रमण शुरु भएपछि बन्द रहेका सिनेमा हल आजदेखि सञ्चालन भएका छन् ।

हल सञ्चालकहरूले आन्दोलनका रूपमा आजदेखि सिनेमा खुला गर्ने निर्णय गरेका हुन् । सरकारले भने सिनेमा हल खोल्न अनुमति दिएको छैन ।

चैत ११ गते लकडाउन घोषणा हुनुअगावै देशभरिका सिनेमा हल एक साथ बन्द गरिएका थिए ।

नेपाल चलचित्र संघले सरकारको आग्रह र हल सञ्चालकहरूले कोरोना महामारीप्रति उत्तरदायित्व बोध गरेर चैत ६ गतेदेखि नै हल बन्द गरेका थिए ।

तर सरकारकै तर्फबाट पनि ठूला सभा र विभिन्न दलका आन्दोलन भइरहँदा पनि संक्रमण देखाएर सिनेमा हल बन्द राखिएपछि संघले आजबाट हल सञ्चानल गर्न लागेका हुन् ।

हल सञ्चालन हुने भएपछि बिहीबार सरसफाइ गरिएको छ । आज दुई नेपाली चलचित्र ‘आमा’ र ‘सेन्टिभाइरस’ देखाउने तयारी छ।