भोली नेपाल आउँदै कोरोनाविरुद्धको खोप (भिडियो रिपोर्ट)

भारतले अनुदानमा दिएको १० लाख डोज खोप पहिलो चरणमा कस-कसले पाउने

भोली नेपाल आउँदै कोरोनाविरुद्धको खोप (भिडियो रिपोर्ट)
बुधबार, माघ ७, २०७७

पुष्कर खतिवडा

काठमाडौं – भारतले नेपाललाई अनुदानमा १० लाख डोज कोरोनाविरूद्धको खोप उपलब्ध गराएको छ । बुधबार स्वास्थ्य मन्त्रालयमा आयोजित संयुक्त पत्रकार सम्मेलनमा भारतले १० लाख डोज उपलब्ध गराएको घोषणा गरिएको हो । पत्रकार सम्मेलनमा स्वास्थ्य तथा जनसंख्या मन्त्री हृदयेश त्रिपाठीले भारत सरकारले नेपाललाई अनुदानमा दिएको कोरोना भाइरसविरुद्धको खोप बिहीबार नै काठमाडौँ आइपुग्ने जानकारी दिए ।

भिडियो रिपोर्ट हेर्नुहोस्ः

पत्रकार सम्मेलनमा मन्त्री त्रिपाठीले खोप भण्डारणको समेत सबै तयारी पूरा भएको जानकारी दिएका छन । प्राप्त खोपको ३ प्रतिशत पहिलो चरणमा स्वास्थ्यकर्मी, एम्बुलेन्स चालक र सुरक्षाकर्मीलाई दिइने मन्त्री त्रिपाठीले बताए ।

नेपालले थप खोप खरिदको तयारी गरिरहेको र त्यसकालागि आर्थिक र प्रशासनिक जटिलता नरहेको मन्त्री त्रिपाठीले दावी गरे । उनले खोप अनुदानमा दिएकोमा भारत सरकार र भारतीय प्रधानमन्त्री नरेन्द्र मोदीसहित प्रधानमन्त्री केपी शर्मा ओलीलाई पनि धन्यवाद दिए ।

स्वास्थ मन्त्रालयमा अयोजित संयुक्त पत्रकार सम्मेलनमा नेपालकालागि भारतीय राजदूत विनयमोहन क्वात्रा पनि उपस्थिति थिए । क्वात्राले नेपाललाई पहिलो प्राथमिकतामा राखेर उपहार स्वरुप भारतले खोप दिएको बताए ।

भारतको अनुदानमा नेपाल आउने कोभिसिल्ड नामक खोप अक्सफोर्ड युनिभर्सिटी र एस्ट्राजेनेकासँग मिलेर विकास गरिएको खोप हो । भारतले नेपालबाहेक माल्दिभ्स, बंगलादेश, भुटान, म्यानमारलगायतका देशलाई खोप अनुदानमा दिने प्रक्रिया थालेको छ । यता औषधि व्यवस्था विभागले पनि उक्त खोपलाई आपतकालीन प्रयोगका लागि स–सर्त अनुमति दिने निर्णय गरेको थियो ।

कोभिड भ्याक्सिन लगाउन महिला स्वास्थ्य स्वयंसेविकासहित विभिन्न स्वास्थ्य संस्थामा कार्यरत २ लाखभन्दा बढी कर्मचारीको सूची स्वास्थ्य मन्त्रालयमा तयारी अवस्थामा छ । नेपालको कुल जनसंख्याको ७२ प्रतिशत नागरिकलाई कोरोना भाइरसविरुद्ध खोप लगाउने सरकारको योजना छ । जस अनुसार १५ वर्षमुनिका बालबालिकालाई भने खोप लगाइने छैन । खोप ल्याउन सरकारले ४८ अर्ब रुपैयाँ बजेट विनियोजन गरेको छ ।