नेपालले कतारमा ‘टी-२० आई’ प्रतियोगिता खेल्ने

काठमाडौँ- नेपाली राष्ट्रिय क्रिकेट टोलीले कतारमा टी-२० आई प्रतियोगिता खेल्ने भएको छ।

मंगलबार बसेको नेपाल क्रिकेट संघ (क्यान)को बोर्ड बैठकले कतारमा हुने वाइल्याट्रल टी-२० खेल्ने निर्णय गरेको हो।

कतार एसोसियसनले कतार स्पोर्ट्स डे को अवसरमा गर्न लागेको बाइल्याट्रल टी–२० मा नेपाल सहभागी हुने भएको छ।

प्रतियोगिता फेब्रुअरी ९ देखि १२ सम्म हुनेछ ।

यसैगरी क्यान बोर्ड बैठकले राष्ट्रिय टोलीको बन्द प्रशिक्षण फेब्रुअरी १ देखि सुरु गर्ने निर्णय गरेको छ। राष्ट्रिय टोलीको मुख्य प्रशिक्षकमा डेभ वाटमोर आएपछि यो पहिलो क्याम्प हो।

क्यानले राजधानीमा जारी प्रधानमन्त्री कप राष्ट्रिय पुरुष प्रतियोगिताको विजेताले १० लाख नगद र उपविजेता टोलीले ५ लाख दिने निर्णय समेत गरेको छ।

माघ ७ देखि सुरु भएको प्रतियोगिता १७ गते सकिँदैछ। तर, पुरस्कार भने आज बल्ल टुङ्गो लागेको हो। यस्तै प्रधानमन्त्री कपको सेमिफाइनल पुग्ने टोली, प्लेयर अफ दि सिरिजले समान ५०/५० हजार पाउने छन्।

प्रतियोगिताको उत्कृष्ट बलर र ब्याट्सम्यानले २५ हजार पाउनेछन्। यस्तै सेमिफाइनल भन्दा अगाडिका खेलमा प्लेयर अफ दि म्याच हुने खेलाडीले ५ हजार पाउनेछन्। यसअघि म्यान अफ दि म्याचले २५ सय पाउँदै आएका छन्।