थिर कोइरालासँग विहे गर्दै गायिका अन्जु पन्त

काठमाडौँ– संगीतकार मनोजराजसँग सम्बन्ध टुटेको लामो समयपछि अञ्जुले पुनः विवाह गर्न लागेकी छन।

इलामका थिर कोइरालासँग उनको बिहे हुन लागेको हो । उनी एक वर्षदेखि प्रेम सम्बन्धमा रहेको बुझिएको छ । दुवैको परिवारमा बिहेको कुराकानी भइरहे पनि मिति भने तय भएको छैन ।

थिर कोइरालाले आफूहरु एक वर्षदेखि प्रेममा रहेको बताएका छन । उनले बिहेको कुरा भइरहेको बताउँदै भने, ‘चाँडै पनि हुन सक्छ, केही समय पनि लाग्न सक्छ ।’

उनले भने–‘तुरुन्त बिहे गरिहाल्ने भन्ने योजना थिएन । अर्को वर्षतिर गर्ने कि भन्ने सल्लाह हुँदै थियो । तर बजारमा हल्ला भएपछि दबाब भने भएको छ ।’

थिर र अञ्जु दुवै क्रिश्चियन धर्ममा आस्था राख्छन् । थिरसँगको एक अन्तर्वार्ताको क्रममा अञ्जुको भेट भएको थियो ।
यसपछि उनीहरु नजिकिएका हुन । थिरले अञ्जुको आवाजमा समावेश केही गीतमा शब्द समेत कोरेका छन् । अञ्जुका अधिकांश तस्वीर थिरले सेयर गरेको देखिन्छ ।

अञ्जुकी छोरी परितोशिका पन्तले केही समयदेखि मिडियामा आमाले बिहे गर्नुपर्ने बताउँदै आएकी थिइन्। अञ्जुले पनि छोरीको दबाबका कारण बिहे गर्ने विषयमा सोचिरहेको बताएकी थिइन्।