Wed Nov 30 2022
मुख्य खबर

आमहड्तालका क्रममा जनकपुरमा घाइते भएका नेकपाका ४ नेतालाई काठमाडौँ ल्याइयो

काठमाडौँ– नेपाल कम्युनिस्ट पार्टी (नेकपा) दाहाल–नेपाल समूहको आमहड्तालका क्रममा जनकपुरमा प्रहरीसँगको झडपमा घाइते भएका नेकपा नेता रामचन्द्र झासहित चार जनालाई थप उपचारका लागि काठमाडौँ ल्याइएको छ ।

आमहड्तालका क्रममा घाइते भएका नेता झा सहित पूर्वमन्त्री एवंम नेकपाका स्थायी कमिटी सदस्य मातृकाप्रसाद यादव, शहीदनगर नगरपालिकाका प्रमुख उदय बरबरिया र नेता प्रदीप साहलाई थप उपचारका लागि काठमाडौँ ल्याइएको हो ।

नेता झाको टाउकोमा चोट लागेको छ । बन्द गराउन हिंडेका झाको समूहलाई प्रहरीले अवरोध गरेपछि झडप भएको थियो । झडपमा प्रहरीको लाठी चार्ज गर्दा झा सहितका नेता तथा कार्यकर्ता घाइते भएका थिए ।

घाइतेहरुलाई प्राथमिक उपचारका लागि प्रादेशिक अस्पताल जनकपुर लगिएको थियो । अस्पतालले उनीहरुलाई जनकपुरबाट काठमाडौं रिफर गरेको हो । अस्पतालले जनाए अनुसार नेता झाको श्वासप्रश्वासमा समस्या देखिएपछि थप उपचारका लागि काठमाडौँ रिफर गरिएको छ ।

‘उहाँको मुटुको चाल ठीक छैन। सास लिन समेत कठिनाइ भइरहेको छ। यहाँ मुटु विशेषज्ञ डाक्टर नरहेकाले काठमाडौं रिफर गरिएको छ,’ प्रादेशिक अस्पताल जनकपुरका मेडिकल सुपेरिटेन्डेन्ट डाक्टर प्रमोद यादवले जानकारी दिए।

काठमाडौँ ल्याइएका सबै घाइतेको नर्भिक अस्पतालमा उपचार भइरहेको छ ।

जनकपुरधामको शिवचोकमा भएको झडपका क्रममा प्रहरीले दर्जन राउण्ड हवाई फायर गर्नुका साथै केही शेल अश्रुंग्यास प्रहार गरेको नेकपाका नेताहरुले जनाएका छन् ।