Mon Nov 28 2022
देश

पदोन्नति भएका ३१ प्रहरी अधिकृतलाई दर्ज्यानी चिह्न

काठमाडौँ- प्रहरीको जनपद तथा प्राविधिकतर्फको विभिन्न पदमा पदोन्नति भएका ३१ प्रहरी अधिकृतलाई आज दर्ज्यानी चिह्न प्रदान गरिएको छ । प्रहरी प्रधान कार्यालयमा आयोजित विशेष समारोहमा प्रहरी महानिरीक्षक शैलेश थापा क्षेत्रीले उनीहरुलाई दर्ज्यानी चिह्नद्वारा सुशोभन गरेका हुन् ।

दर्ज्यानी चिह्न प्राप्त गर्नेमा प्रहरी नायब उपरीक्षकबाट प्रहरी उपरीक्षक पदमा पदोन्नति भएका १५, प्राविधिक प्रहरी नायब उपरीक्षकबाट प्राविधिक प्रहरी उपरीक्षक पदमा पदोन्नति भएका एक र प्राविधिक प्रहरी नायब उपरीक्षक पदमा १५ गरी ३१ जना प्रहरी अधिकृत छन् । नेपाल सरकार, गृहसचिवस्तरको २०७७ माघ २१ गतेको निर्णयअनुसार उनीहरु पदोन्नति भएका थिए ।

सोही निर्णयानुसार प्रहरी नायब उपरीक्षकबाट प्रहरी उपरीक्षक पदमा पदोन्नति भएका एक अधिकृत भने हाल सुडान डार्फरस्थित एफपीयू मिसनमा छन् । उक्त समारोहमा प्रहरी महानिरीक्षक थापा क्षेत्रीले पदोन्नति भएका प्रहरी अधिकृतलाई बधाई दिँदै नयाँ जिम्मेवारीलाई थप सजगता र सतर्कताका साथ कार्य सम्पादन गर्न निर्देशन दिए ।

नेपाल सरकारद्वारा घोषित निर्वाचनप्रति संवेदनशील भई सुरक्षालाई थप मजबुत बनाउनतर्फ केन्द्रित हुन पनि प्रहरी अधिकृतलाई आग्रह गरे ।

नागरिकसँगको सहकार्यमा प्रहरीले असल भावका साथ कार्यसम्पादन गर्नुपर्ने चर्चा गर्दै उनले आचरण एवं व्यवहारमा प्रहरी सदैव संवेदनशील हुनुपर्ने बताए । संगठनले अंगीकार गरेको नीति तथा प्रणालीप्रति सबै प्रहरी कर्मचारी पदीय दायित्वअनुसार ऐक्यबद्ध भई अगाडि बढ्नुपर्नेमा उनले जोड दिए ।

पदोन्नति भएका प्रहरी अधिकृतको तर्फबाट बोल्दै प्रहरी उपरीक्षक ऋषिराम कँडेलले संगठनले लिएको उद्देश्य प्राप्तिका लागि सदैव ऐक्यबद्ध भई नयाँ ऊर्जाका साथ काम गर्ने प्रतिबद्धता व्यक्त गरे ।