उपभोक्ता ठग्ने कलंकीस्थित एक मेहेन्दी उद्योगमा शिलबन्दी

जसले 'ओरिजिनल लेखिएको होलोग्राम' टाँसेर नक्कली कस्मेटिक सामान बेचे

उपभोक्ता ठग्ने कलंकीस्थित एक मेहेन्दी उद्योगमा शिलबन्दी
बुधबार, चैत्र २५, २०७७

काठमाडौँ– वाणिज्य, आपूर्ति तथा उपभोक्ता संरक्षण विभागले काठमाडौँको कलंकीस्थित एक मेहेन्दी उद्योगमा शिलबन्दी गरेको छ ।

उपभोक्ता ठगी गरेको पाइएपछि विभागले कलंकीस्थित मेहेन्दी र मलतानी माटो प्याकिङ्ग गर्ने ‘हबिब काला कोकिला हिनाज’ उद्योगमा शिलबन्दी गरेको हो ।

विभागका निर्देशक एवं प्रवक्ता शिवराज सेढाईंले उक्त उद्योगमाथि शिलबन्दी गरी थप अनुसन्धान प्रक्रिया अघि बढाइएको जानकारी दिए ।

‘उक्त उद्योगले उपभोक्ता संरक्षण ऐन, २०७५ को दफा १६ विपरित अनुचित व्यापारिक वा व्यवसायजन्य क्रियाकलाप गरी अन्य उत्पादक (विदेशी) का ट्रेडमार्क/ब्राण्ड प्रयोग गरी जनस्वास्थ्यमा हानी/नोक्सानी पुग्ने गरी कारोबार गरेको पाइएपछि शिलबन्दी गरिएको छ,’ प्रवक्ता सेढाईंले भने, ‘उक्त क्रियाकलापमा प्रत्यक्ष संलग्न एक जनालाई प्रहरीले नियन्त्रणमा लिएर अनुसन्धान अघि बढाएको छ ।’

अप्रमाणित रसायन मिश्रण गरेर मेहेन्दी लगायतका तीन दर्जन भन्दा बढी किसिमका कस्मेटिक वस्तु गोप्य रुपमा उत्पादन गरेको, भन्डारण, आयात एवम् विक्री वितरण समेत गरेको गोप्य सूचनाका आधारमा विभागले महानगरीय प्रहारी अपराध महाशाखाको सहयोगमा उक्त उद्योगमा शिलबन्दी गरेको हो ।

गोप्य सूचना पाएपछि महाशाखा र विभागको संयुक्त टोलीले मंगलबार उक्त उद्योगमा छापा मारेको हो ।

उक्त उद्योगमा विशेषगरी नेपाल र भारतमा उत्पादन हुने कस्मेटिक सामान गैरकानुनकी रूपमा उत्पादन हुने गरेको पाइएको प्रहरीले जनाएको छ ।

उद्योगका सञ्चालक कलंकी बस्ने ३३ वर्षीय चेतन गोयललाई प्रहरीले नियन्त्रणमा लिएको छ । उनी यसअघि पनि पक्राउ परिसकेका व्यक्ति रहेको महाशाखाले जानकारी दिएको छ।

प्रहरीले उद्योगबाट २४ प्रकारका कस्मेटिक सामान तथा सामान बनाउन प्रयोग हुने चार वटा मेसिन बरामद गरेको छ । हबिब काला-कोलाका विभिन्न कस्मेटिक सामान गोयल आफैंले तयार गरी ओरिजिनल लेखिएका होलोग्राम टाँसेरे बिक्री गर्ने गरेको पाइएको प्रहरीले जनाएको छ ।