भारतमा स्थिति भयावह : एकैदिन ३ लाख ७९ हजार बढीमा कोरोना संक्रमण, ३६ सय ४७ को मृत्यु

भारतमा स्थिति भयावह : एकैदिन ३ लाख ७९ हजार बढीमा कोरोना संक्रमण, ३६ सय ४७ को मृत्यु
बिहिबार, बैशाख १६, २०७८

काठमाडौँ– छिमेकी मुलुक भारतमा कोरोना भाइरस संक्रमणको दर तीव्र बनेको छ ।

पछिल्लो २४ घण्टामा मात्रै भारतमा ३ लाख ७९ हजार ४५९ जनामा कोरोना भाइरसको संक्रमण पुष्टि भएको छ भने ३ हजार ६४७ जनाको मृत्यु भएको छ ।  यो संख्या अहिलेसम्मकै सबैभन्दा बढी हो ।

नयाँ थपिएकासहित  भारतमा संक्रमितहरुको कुल संख्या १ करोड ८३ लाख ६८ हजार नाघेकोे छ । भारतमा संक्रमणमुक्त हुनेको संख्या १ करोड ५० लाख ७८ हजार २ सय नाघेको छ ।

भारतमा सक्रिय संक्रमितको संख्या ३० लाख ८५ हजार बढी रहेको छ । त्यस्तै भारतमा कोरोना संक्रमणले मृत्यु हुनेको संख्या २ लाख ४ हजार ८१२ पुगेको छ ।

यसैगरी विश्वमा हालसम्म कोरोना संक्रमितकोसंख्या १८ करोड ३६ लाख ८ हजार नाघेको छ । यो समाचार तयार पार्दासम्म विश्वमा ३१ लाख ६३ हजार ३९६ संक्रमितले ज्यान गुमाएका छन् ।

विश्वमा संक्रमितमध्ये १२ करोड ७७ लाख ३१ हजार बढीले कोरोनाको संक्रमण जितेका छन् । अहिले विश्वमा १ करोड ९३ लाख १४ हजार बढी सक्रिय संक्रमित रहेका छन । सक्रिय संक्रमितमध्ये १ लाख १० हजार बढीका स्वास्थ्य अवस्था गम्भीर छ ।

कोरोनाबाट बढी प्रभाबित हुने मुलुकको सूचीमा अमेरीका पहिलो स्थानमा छ । भारत दोश्रो र ब्राजिल तेश्रो स्थानमा छ ।