इजरायल-प्यालेष्टाइन द्वन्द्व : सम्भव भएसम्मका सबै सुरक्षाका उपाय अपनाउन नेपालीलाई दूतावासको आग्रह

इजरायल-प्यालेष्टाइन द्वन्द्व : सम्भव भएसम्मका सबै सुरक्षाका उपाय अपनाउन नेपालीलाई दूतावासको आग्रह
बिहिबार, जेष्ठ ६, २०७८

दोहा- इजरायल र प्यालेष्टाइनबीच बढ्दै गएको तनावका कारण इजरायलमा रहेका नेपाली पनि जोखिममा परेका छन् ।

द्वन्द्वको जोखिमा नेपाली पनि परेपछि इजरायलस्थित नेपाली दूतावासले साइरन बज्नसाथ बंकरमा जान अनुरोध गरेको छ ।

मे १० देखि इजरायलको जेरुसेलम, दक्षिण इजरायली क्षेत्रका साथसाथै तेलअबिबलगायतका केन्द्रमा समेत गाजा क्षेत्रबाट हजारौँको सङ्ख्यामा रकेट आक्रमण भइरहेको दूतावासले जनाएको छ ।

यस परिस्थितिलाई नजरअन्दाज नगर्न तथा सम्भव भएसम्मका सुरक्षाका उपायहरूको खोजी गर्नेतर्फ लाग्न समेत दूतावासले त्यहाँ कार्यरत नेपाली समुदायलाई अपिल गरेको छ ।

यी हुन् दूतावासले सुझाएका सुरक्षाका उपायहरू

– खासगरी साइरन बज्नासाथ घर भित्र हुनुहुन्छ भने बङ्कर, भर्याङ्ग वा त्यस्तै सुरक्षित क्षेत्रमा जानुहोला, अल्छी पटक्कै नगर्नुहोला। झ्याल नजिक तथा भित्तामा खस्नसक्ने सामानको नजिक नजान ।

– यदि घरबाहिर (बजार, सडक, फार्म वा अन्यत्र कतै) हुनुहुन्छ भने पनि नजिकैको बङ्करमा पुगिहाल्नुहुन र त्यो पनि उपलब्ध नभएमा जहाँ हुनुहुन्छ त्यहाँ घोप्टो परेर दुई हातले टाउको छोपेर बस्न ।

-केही साथीहरुले रकेट लन्च भैरहेको बेलामा छतबाट हेर्ने, फेसबुक लाइभ गर्ने र भिडियो बनाउने गर्ने गरेको देखिएकोले त्यसो नगर्न ।

– अप्ठ्यारो परिस्थिति छ, हामी त्रसित छौं। यसको नकारात्मक सन्देश जाने गरी सोसल मिडियाहरुमा सेयर गरेर नेपालमा रहेका परिवारलाई त्रसित नगराउन (तर सही सूचना छ भने चाहिँ व्हट्सएप्स वा मेसेन्जरबाट साथीहरुसँग सेयर गरौं।)

– कुनै समस्या परेमा दूतावास वा आफ्नो साथीभाइ वा इजरायलमा क्रियाशील नेपाली संघसंस्थाका प्रतिनिधिहरुलाई सम्पर्क गर्नुहुन समेत दूतावासले भनेको छ । दूतावासमा द्वितीय सचिव अर्जुन घिमिरेलाई ०५२८२८९३०० मा र श्रम सहचारी प्रदीप सागर गिरीलाई ०५४३३०६०७० मा सम्पर्क गर्न सकिने जनाएको छ ।

इजराइलमा जारी द्धन्द्धको अवस्थामा अहिलेसम्म पनि कुनै नेपाली हताहत नभएको दूतावासले जनाएको छ । इजरायलमा हाल २५ सयको हाराहारीमा नेपालीहरु कार्यरत छन् ।